Siria njoftoi të martën në mbrëmje se ka arrestuar të gjithë anëtarët e një celule terroriste të ISIS-it përgjegjëse për bombardimin e kishës ortodokse greke në kryeqytetin Damask gjatë fundjavës.
Në një konferencë për shtyp, zëdhënësi i Ministrisë së Brendshme, Nour al-Din al-Baba, deklaroi:
“Njësitë e sigurisë siriane në periferi të Damaskut ndërmorën një operacion të synuar kundër lokacioneve të celulës terroriste që kreu sulmin ndaj kishës Mar Elias në lagjen al-Dweilaa.”
Ai shtoi se “celula ishte e lidhur me ISIS-in dhe nuk kishte lidhje me ndonjë organizatë fetare,” pa dhënë detaje të tjera.
Lidhur me strukturën e celulës, zëdhënësi tha se ajo udhëhiqej nga shtetasi sirian Muhammad al-Jamaili, i njohur gjithashtu si Abu Imad al-Jamaili, i cili më parë kishte qenë i njohur brenda ISIS-it si i ashtuquajturi “guvernatori i shkretëtirës”.
Nga dy sulmuesit vetëvrasës, njëri kreu sulmin në kishë, ndërsa tjetri u arrestua teksa ishte në rrugë për të kryer një sulm të ngjashëm në faltoren Sayyida Zainab pranë Damaskut.
Sipas al-Babas, ata “u infiltruan në kryeqytet pas çlirimit të tij me ndihmën e Abu Imad al-Jamailit, duke shfrytëzuar boshllëkun e sigurisë që pasoi çlirimin (në dhjetor të kaluar).”
“Ata nuk janë sirianë,” theksoi ai.
Zëdhënësi e përshkroi ISIS-in si një “grup terrorist ndërkufitar”, duke shtuar se Siria po bashkëpunon me vendet fqinje për të luftuar këtë grup.
Një sulmues vetëvrasës i ISIS-it hapi zjarr të dielën brenda kishës Mar Elias në pjesën lindore të Damaskut, përpara se të shpërthente veten, duke vrarë të paktën 25 persona dhe plagosur dhjetëra të tjerë, sipas të dhënave të Ministrisë së Shëndetësisë.
Që nga rrëzimi i regjimit të Bashar al-Asadit, shërbimet e sigurisë siriane vazhdojnë ndjekjen penale ndaj individëve të akuzuar për krime, shkelje të të drejtave të njeriut dhe veprimtari terroriste.
Asadi, i cili ishte udhëheqës i Sirisë për gati 25 vjet, u arratis në Rusi në dhjetor, duke i dhënë fund regjimit të Partisë Baas që ishte në pushtet që nga viti 1963.
Ahmad al-Sharaa, i cili udhëhoqi forcat kundër regjimit për rrëzimin e Asadit, u shpall president i periudhës kalimtare në janar.
