Pavarësisht përshkallëzimit të tensioneve me Iranin, Izraeli vazhdoi të hënëni sulmet e tij në Gaza.

Tymi i dendur u ngri mbi Khan Younis në jug të Gazës, duke shënuar një ditë tjetër sulmesh shkatërruese.

Të paktën 13 palestinezë, përfshirë njerëz që prisnin ndihmë humanitare, u vranë dhe shumë të tjerë u plagosën në sulmet izraelite në Gaza të dielën, raportuan mediat lokale.

Forcat izraelite hapën zjarr ndaj palestinezëve që prisnin ushqim pranë një qendre shpërndarjeje ndihmash izraelite në Korridorin Netzarim në Gazën qendrore, duke vrarë tre persona, tha agjencia zyrtare e lajmeve Wafa, duke cituar burime mjekësore.

Dy persona të tjerë u vranë dhe dhjetëra të tjerë u plagosën në sulmet izraelite pranë një qendre tjetër shpërndarjeje në Rafah në Gazën jugore, njoftoi Wafa.

Disa persona u plagosën gjithashtu në një sulm tjetër izraelit ndaj civilëve që prisnin ndihmë në qytetin jugor të Khan Younis, tha agjencia e lajmeve.

Në veri të Gazës, shtatë civilë u vranë në sulmet izraelite që synonin rrugët e kamionëve të ndihmës në qytetet Al-Sudaniya dhe Beit Lahia, tha një burim mjekësor për AA-në.

Sulmet izraelite goditën gjithashtu një apartament banimi në kampin e refugjatëve Nuseirat në qendër të Gazës, duke vrarë një palestinez të ri dhe duke plagosur të tjerë.

Izraeli ka bllokuar hyrjen e ndihmës humanitare, ushqimit dhe furnizimeve mjekësore në Gaza që nga 2 marsi, duke çuar në një uri të përhapur dhe pothuajse në shembjen e sistemit shëndetësor.

Duke injoruar thirrjet ndërkombëtare për armëpushim, ushtria izraelite ka zhvilluar një ofensivë brutale në Gaza që nga tetori 2023, duke vrarë gati 55.400 palestinezë, kryesisht gra dhe fëmijë.

Në nëntor të vitit të kaluar, Gjykata Ndërkombëtare Penale lëshoi ​​urdhërarreste për kryeministrin izraelit Benjamin Netanyahu dhe ish-ministrin e Mbrojtjes Yoav Gallant për krime lufte dhe krime kundër njerëzimit në Gaza.

Izraeli gjithashtu përballet me një akuzë për gjenocid para Gjykatës Ndërkombëtare të Drejtësisë për luftën në enklavën palestineze.