Presidenti i Argjentinës, Javier Milei, ka deklaruar se vendi i tij do ta zhvendosë ambasadën nga Tel Avivi në Jerusalemin Perëndimor, një prej çështjeve më të ndjeshme në konfliktin izraelito-palestinez.

“Jam krenar të njoftoj para jush se në vitin 2026 do ta bëjmë efektive zhvendosjen e ambasadës sonë në qytetin e Jerusalemit Perëndimor”, tha Milei të mërkurën në një fjalim në parlamentin izraelit gjatë një vizite zyrtare.

Aktualisht, ambasada argjentinase ndodhet pranë qytetit bregdetar Tel Aviv.

Kjo është hera e dytë që Milei viziton zyrtarisht Izraelin, hera e parë ishte në shkurt të vitit 2024, vetëm dy muaj pas marrjes së detyrës si president, dhe ishte udhëtimi i tij i parë jashtë vendit.

Vizita e tij këtë javë në Tel Aviv dhe Jerusalem përfshin një agjendë të ngjeshur: takime me kryeministrin izraelit Benjamin Netanyahu, familjarët e pengjeve të luftës, një vizitë në Murin Perëndimor dhe marrjen e të ashtuquajturit “Çmimi Nobel Hebre”.

Milei është cilësuar si një nga aleatët më të zëshëm ndërkombëtarë të Izraelit gjatë ofensivës së tij ushtarake në Gaza.