Zyrtarët e BE-së të premten u bënë thirrje të gjitha palëve në Lindjen e Mesme të tregojnë kujdes maksimal dhe të shmangin përshkallëzimin e mëtejshëm mes tensioneve në rritje në rajon.

"Raportet që dalin nga Lindja e Mesme janë thellësisht alarmante", tha Presidentja e Komisionit Evropian Ursula von der Leyen në X pas sulmeve izraelite gjatë natës në Iran.

Ajo theksoi se një zgjidhje diplomatike tani është më urgjente se kurrë "për hir të stabilitetit të rajonit dhe sigurisë globale", duke shtuar: "Evropa u kërkon të gjitha palëve të ushtrojnë përmbajtje maksimale, të deeskalojnë menjëherë dhe të përmbahen nga hakmarrja".

Shefeja e politikës së jashtme të BE-së Kaja Kallas i bëri jehonë thirrjeve të von der Leyen për përmbajtje, duke i nxitur të gjitha palët në Lindjen e Mesme të shmangin përshkallëzimin e mëtejshëm mes tensioneve në rritje në rajon.

"Situata në Lindjen e Mesme është e rrezikshme. U bëj thirrje të gjitha palëve të  përmbahen dhe të parandalojnë përshkallëzimin e mëtejshëm", shkroi Kallas në X, duke shtuar se ajo është e gatshme të mbështesë çdo përpjekje diplomatike drejt deeskalimit.

Presidenti i Këshillit të BE-së, Antonio Costa, gjithashtu shprehu shqetësim dhe kërkoi diplomaci, duke thënë në X: "Jam thellësisht i shqetësuar nga ngjarjet e fundit në Lindjen e Mesme. Një përshkallëzim i mëtejshëm i rrezikshëm duhet të shmanget, pasi do të destabilizonte të gjithë rajonin."

Izraeli nisi një operacion të gjerë ushtarak kundër Iranit të premten herët, me sulme që synonin programin e tij bërthamor dhe aftësitë e raketave me rreze të gjatë veprimi, raportoi Radioja e Ushtrisë Izraelite.

Izraeli shpalli një gjendje të jashtëzakonshme në të gjithë vendin dhe mbylli hapësirën e tij ajrore, duke devijuar të gjitha fluturimet në vende të tjera, raportuan mediat në gjuhën hebraike.

Një total prej 200 aeroplanësh izraelitë goditën Iranin në sulmin e tij, tha ushtria izraelite.