Ministri i Jashtëm i Türkiyes zhvilloi të enjten telefonata të ndara me Kryeministrin e Katarit dhe përfaqësues të Byrosë Politike të Hamasit palestinez, konfirmuan burimet diplomatike turke.

Sipas të njëjtave burime, Fidan diskutoi me Sheikh Mohammed bin Abdulrahman Al Thani për situatën në Gaza dhe Siri.

Në një telefonatë të veçantë, biseda e Fidanit me përfaqësuesit e Hamasit u përqendrua në përpjekjet e vazhdueshme për të siguruar një armëpushim në Gaza.

Ushtria izraelite, duke injoruar thirrjet ndërkombëtare për një armëpushim, ka zhvilluar një ofensivë shkatërruese në Gaza që nga tetori i vitit 2023, duke vrarë më shumë se 54.200 palestinezë, kryesisht gra dhe fëmijë.

Agjencitë humanitare kanë paralajmëruar për rrezikun e urisë në mesin e më shumë se dy milionë banorëve të enklavës.

Në nëntor të vitit të kaluar, Gjykata Ndërkombëtare Penale lëshoi urdhër-arreste për kryeministrin izraelit Benjamin Netanyahu dhe ish-ministrin e Mbrojtjes Yoav Gallant, duke i akuzuar për krime lufte dhe krime kundër njerëzimit në Gaza. Izraeli përballet gjithashtu me një padi për gjenocid para Gjykatës Ndërkombëtare të Drejtësisë, për krime kundër civilëve në enklavën palestineze.