Policia e shtetit amerikan Minnesota arrestoi të dielën personin e dyshuar për të shtënat ndaj dy deputetëve dhe bashkëshortëve të tyre, raportojnë mediat.
Vance Boelter, 57 vjeç, u arrestua nga forcat e rendit pas një kërkimi kombëtar që zgjati gati dy ditë, i cili nisi pas të shtënave vdekjeprurëse të ndodhura në orët e para të mëngjesit të së shtunës. Ai akuzohet për vrasjen e ish-kryetares së Dhomës së Përfaqësuesve nga Partia Demokratike, Melissa Hortman, dhe bashkëshortit të saj, Mark, si dhe për plagosjen e senatorit demokrat John Hoffman dhe bashkëshortes së tij, Yvette.
“Grupi i përbashkët i agjencive, përfshirë Patrullën Shtetërore të Minnesotës, arrestoi Boelter”, shkroi gazetari Tom Hauser nga KSTP-TV në platformën X. “Ai është kapur i gjallë pranë Green Isle, ku kërkimi ka qenë i përqendruar gjatë gjithë ditës.”
Sipas hetuesve, Boelter ishte maskuar si oficer policie kur qëlloi dhe vrau Hortman dhe bashkëshortin e saj në shtëpinë e tyre në Brooklyn Park. Më pas ai udhëtoi drejt Champlin, rreth 14,5 kilometra larg, ku qëlloi Hoffman-in dhe gruan e tij në shtëpinë e tyre.
“John po i nënshtrohet shumë operacioneve dhe çdo orë po afrohet më shumë drejt daljes nga rreziku”, shkroi Yvette, bashkëshortja e tij, në një mesazh të publikuar në X nga senatorja amerikane Amy Klobuchar. “Ai mori nëntë plumba. Unë mora tetë dhe të dy jemi jashtëzakonisht me fat që jemi gjallë.”
“Jemi të tronditur dhe të shkatërruar nga humbja e Melissës dhe Markut”, shtoi ajo. “Nuk kemi fjalë. Kurrë nuk ka vend për këtë lloj urrejtjeje.”
Autoritetet thanë se kanë marrë në pyetje bashkëshorten e Boelter-it dhe anëtarë të tjerë të familjes lidhur me të shtënat, por asnjëri prej tyre nuk është në arrest. Ata shtuan se të gjithë kanë bashkëpunuar me hetimet.
Policia ende nuk ka dhënë një arsye për të shtënat fatale, por hetuesit thanë se një listë me rreth 70 emra u gjet në dokumente të marra nga një mjet i rremë policie që Boelter kishte lënë në vendngjarje. Lista përmbante emra të ligjvënësve shtetërorë dhe federalë si dhe figura të rëndësishme të komunitetit. Po ashtu, në materialet e gjetura kishte informacione për mbrojtës të të drejtave të abortit dhe institucione shëndetësore.
Boelter është një ish-zyrtar politik që më parë ka shërbyer në të njëjtin bord shtetëror për zhvillimin e fuqisë punëtore ku ishte dhe Hoffman, sipas dokumenteve zyrtare.
Sipas hetuesve, Boelter u kishte dërguar mesazhe miqve të tij për t’u kërkuar falje pas të shtënave, megjithatë nuk përmendi konkretisht çfarë kishte bërë.
