Түркия Президенті Режеп Тайып Ердоған сейсенбі күні Стамбулда өткен Халықаралық қорғаныс өнеркәсібі көрмесінің (IDEF) ашылу салтанатында сөйлеген сөзінде Израильдің Газадағы палестиналық халыққа қарсы жасап отырған «нацистерден әлдеқайда асып түсетін геноцидін» бүкіл адамзаттың күн тәртібінде қалатынын айтты.

«Мақсатымыз – тез арада атысты тоқтату келісіміне қол жеткізу. Газаға гуманитарлық көмектердің кіруіне рұқсат берілуі – тағы бір басымдығымыз», – деген Ердоған «Газаға гуманитарлық көмек жіберуге рұқсат берілмегендіктен аштықтан қажыған балалардың қайғысы – біздің де қайғымыз», – деп қосты.

Ол сөзін былай жалғастырды: «Күн сайын ондаған бейкүнә жанның бір үзім нан, бір жұтым су таппай жан тапсыруына адамгершілігі бар ешбір жан шыдай алмайды. Аштықтан жаппай қырылу басталған бұл қаралы күндерде мен бүкіл халықаралық қауымдастықты адамгершілік майданына бірігуге шақырамын.»

Сондай-ақ Ердоған Түркияның қорғаныс өнеркәсібіндегі жетістіктеріне тоқталып, елдің «эмбарго, қосарлы стандарттар мен дипломатиялық қысымдарды» еңсеріп, бүгінгі таңда әлемдік нарыққа өз мөрін басқан жаһандық күшке айналғанын мәлімдеді.

Ердоған: «Қорғаныс өнеркәсібіміздегі отандық өнім үлесі бүгінде 80 пайыздан асты»

Сейсенбі күні басталған алты күндік көрме Түркия Президенті, Ұлттық қорғаныс министрлігі, Қорғаныс өнеркәсібі басқармасы және Түрік Қарулы Күштерін Күшейту Қорының үйлестіруімен ұйымдастырылуда.

Биыл он жетінші рет өткізіліп отырған көрме Стамбул көрме орталығы, Ататүрік әуежайы, “Wow” қонақ үйі және Атакөй кемежайында қатар өткізілуде.

Көрмеде брондалған ұрыс машиналары, тактикалық броньды көліктер, ұшқышсыз құрлық, әуе және теңіз аппараттары, қару жүйелері, зымырандар, алыс қашықтыққа арналған танкке қарсы зымыран жүйелері, жаяу әскер қарулары, әскери тренажерлер, радиоэлектрондық күрес шешімдері, күш қондырғылары және жарылғыш заттарды залалсыздандыру жабдықтары қойылған.

Көптеген қатысушының қызығушылығын тудыруы күтілетін көрме аясында бірқатар қол қою рәсімдері де ұйымдастырылады.

Алдыңғы көрме 2023 жылғы шілде айында тағы да Стамбулда өткен болатын.