Колумбия университеті биыл көктемде кампуста өткен Палестинаны қолдау акцияларына қатысқан ондаған студентке жаза қолданды.

Университет әкімшілігі мен бір студенттік ұйым растаған бұл жаза мамыр айында Батлер кітапханасында өткен наразылық және 2024 жылдың көктемгі семестрінде кампус аумағында тігілген шатырлы наразылық кезінде болған студенттік әрекеттерге байланысты берілді.

Қолданылған шараларға бақылаумен шартты жаза, бір жылдан үш жылға дейінгі шеттету, оқудан шығару және академиялық дәрежелерді жою секілді жаза түрлері енгізілді.

Колумбия университеті жазбаша мәлімдемесінде "Дамыған академиялық қауымдастық құру үшін бір-бірімізге және оқу орнының негізгі қызметіне, саясатына, ережелеріне құрмет көрсетілуі керек," – деп мәлімдеді.

"Академиялық қызметтің бұзылуы университет саясаты мен ережелерін бұзуды білдіреді және мұндай бұзушылықтардың міндетті түрде нәтижесі болады," – деп жазылған мәлімдемеде дисциплиналық процестердің әділ әрі мұқият жүргізілгені де атап өтілді.

Оқудан шығару

Университет жазаланған студенттердің нақты санын жарияламағанымен, «Columbia University Apartheid Divest» (CUAD) атты студенттік коалиция шамамен 80 студенттің жаза алғанын хабарлады.

CUAD мәлімдемесіне сәйкес, студенттерге дүйсенбі күні жаза туралы ресми хабарламалар табысталды. Уақытша шеттетілген студенттерге оқу орнына қайта оралу үшін ресми кешірім хатын ұсыну талап етілді.

Ұйым бұл талапты орындаудан бас тартқан студенттердің шеттетілуі "фактілік оқудан шығару" (de facto expulsion) ретінде қарастырылуы мүмкін екенін ескертті.

CUAD бұл шараларды университет пен федералды билік арасындағы жасырын келісімнің бір бөлігі деп мәлімдеді. Айтуынша, Трамп әкімшілігінің университетке қатысты жүздеген миллион долларлық федералды қаржыландыруды тоқтату шешімінен кейін осындай келісім жасалған.

Студенттік ұйым мәлімдемесінде "Бұл шаралар – Колумбияның жуырда жариялайын деп отырған федералдық келісімінің бір бөлігі. Бұл келісімде Сионистік Жала жабуға қарсы лиганың (Anti-Defamation League) ресми серіктестігі және Израильге қарсы сын-ескертулерді антисемитизмге теңестіретін IHRA-ның антисемитизм анықтамасын қабылдау қарастырылған," – делінді.

Университеттерге қатаң шаралар

Колумбия университетінің студенттерге қолданған  жазалары Дональд Трамптың Палестинаны қолдайтын наразылықтар үшін АҚШ-тағы университеттерге шабуылын бастағаннан кейін енгізілді.

Трамп алғашқы қадам ретінде АҚШ университеттеріндегі Палестинаны қолдайтын наразылық толқынын бастап берген Колумбия университетіне 400 миллион доллар көлеміндегі федералдық қаржыны тоқтатты.

Ақыры университет бұл қысымға төтеп бере алмай, кампустағы наразылықтарға қатысты саясатын түбегейлі өзгертетінін мәлімдеді.

Кейіннен Трамп әкімшілігі Корнелл университеті мен Нортвестерн университетіне Палестинаны қолдайтын наразылықтарға жол бергені үшін бұл оқу орындарының федералдық қаржысын тоқтатты.

Ал Трамп әкімшілігімен үлкен қақтығысқа түскен Гарвард университеті шамамен 2,3 миллиард долларлық қаржының тоқтатылуына байланысты сотқа жүгінді.