Иран Сыртқы істер министрі АҚШ-тың әуе шабуылдарының ауыр зардаптарына қарамастан Тегеран ядролық бағдарламадан бас тартпайтынын мәлімдеді. Ол уранды байыту ұлттық мақтаныш екеніне тоқталды.

Иранның Сыртқы істер министрі Аббас Аракчи «Fox News» телеарнасына берген сұхбатында: «Иә, келтірілген залал ауыр, сондықтан уран байыту әзірге тоқтатылды», - деді.

«Шындығына келер болсақ, біз уран байытудан бас тарта алмаймыз, өйткені бұл ғалымдарымыздың жетістігі», - деп қосты ол.

Аракчи болашақта жасалатын кез келген ядролық келісім Иранның уран байыту құқығын қамтуы керектігін айтты.

Аракчидің мәлімдемелері АҚШ-тың 22 маусымда үш ядролық нысанға, соның ішінде жерасты Фордо нысанына жасалған әуе шабуылынан бірнеше апта өткен соң жасалды. Бұл шабуыл Израильдің Иранмен 12 күндік соғысына жауап болатын.

Аракчи нысандардың «зақымдалғанын» мойындап, Иранның ядролық бағдарламасының өзгеріссіз қалғанын баса айтты. «Технология осында. Біздің ядролық бағдарламамыз, уран байыту бағдарламамыз бомбалау арқылы жойылмайды», - деді ол.

«Қажет болған жағдайда шабуыл жасалады»

АҚШ президенті Дональд Трамп Аракчидің мәлімдемесіне «Truth Social» платформасы арқылы жауап берді. «Бұрын айтқанымдай, қажет болса қайталаймыз!» деп жазды ол.

Кейінгі жазбасында Трамп «CNN» телеарнасын «АҚШ барлау қызметінің шабуылдары Иранның ядролық бағдарламасын бірнеше айға ғана кешіктіруі мүмкін» деген мәліметтеріне сілтеме жасағаны үшін сынады. Президент «CNN» басшылығын тілшіні жұмыстан шығаруға шақырды.

Сондай-ақ Аракчи Иранның Атом энергиясы ұйымының әлі де ядролық материал мен нысандарға келтірілген зиянның көлемін есептеп жатқанын растады. Алайда ол байытылған уранның қазіргі жағдайын нақтыламады.