نیپال کے 55 سالہ کوہ پیما جنھیں 'ایورسٹ مین' کا نام دیا گیا ہے، تین دہائیوں بعد منگل کو 31 ویں مرتبہ دنیا کی بلند ترین چوٹی پر پہنچ گئے۔

سیون سمٹ ٹریکس نامی مہم کے منتظمین کا کہنا تھا کہ 'لیجنڈری کامی ریتا شیرپا کو ماؤنٹ ایورسٹ کی 31 ویں کامیابی سے سر کرنے پر بہت بہت مبارک  ہو۔

کامی ریتا شیرپا کسی تعارف کی محتاج نہیں ہیں۔ وہ نہ صرف قومی کوہ پیمائی کے ہیرو ہیں بلکہ ایورسٹ کی عالمی علامت بھی ہیں۔

شیرپا پہلی بار 1994 میں ماؤنٹ ایورسٹ کی چوٹی پر کھڑے ہوئے تھے جب وہ ایک تجارتی مہم کے لئے کام کر رہے تھے۔

اس کے بعد سے، وہ تقریبا ہر سال ایورسٹ کو سر کرتے ہیں اور  سیاحوں کی رہنمائی کرتے ہیں۔

29 ویں اور 30 ویں بار 8,849 میٹر (29،032 فٹ) چوٹی کو سر کرنے کے بعد ایک سال قبل بات کرتے ہوئے شیرپا نے کہا تھا کہ وہ "صرف کام کر رہے تھے" اور ریکارڈ قائم کرنے کا ارادہ نہیں رکھتے تھے۔

انہوں نے مئی 2024 میں اے ایف پی کو بتایا، "میں اس ریکارڈ پر خوش ہوں، لیکن آخر کار ریکارڈ ٹوٹ جاتے ہیں"مجھے زیادہ خوشی ہے کہ میری چڑھائی سے نیپال کو دنیا میں پہچان حاصل کرنے میں مدد ملتی ہے۔

سیون سمٹ ٹریکس نے کہا کہ انہوں نے ہندوستانی فوج کی ٹیم کے قائد کی حیثیت سے منگل کو چڑھائی مکمل کی، انہوں نے مزید کہا کہ وہ "نہ صرف خود چوٹی پر پہنچے، بلکہ ٹیم کے آخری باقی ارکان کی قیادت اور رہنمائی بھی کی"۔

یہ کامیابی ایسے وقت میں سامنے آئی ہے جب موسم بہار کی چڑھائی کا موسم اپنے اختتام کے قریب ہے۔

نیپال کے محکمہ سیاحت کے مطابق اچھے موسم کا فائدہ اٹھاتے ہوئے روٹ کھلنے کے بعد سے اب تک 500 سے زائد کوہ پیما اور ان کے گائیڈ ایورسٹ کی چوٹی پر پہنچ چکے ہیں۔

اس سیزن میں اب تک حالیہ برسوں میں ایورسٹ پر سب سے کم اموات ریکارڈ کی گئی ہیں۔ دو کوہ پیما، جن میں ایک فلپائنی اور ایک ہندوستانی شامل ہیں، اس کے اونچے کیمپوں میں ہلاک ہو گئے ہیں۔

نیپال نے رواں سیزن میں کوہ پیماؤں کے لیے 1100 سے زائد اجازت نامے جاری کیے ہیں جن میں ایورسٹ کے لیے 458 اجازت نامے بھی شامل ہیں۔

یہ ملک دنیا کی 10 بلند ترین چوٹیوں میں سے آٹھ کا گھر ہے اور ہر موسم بہار میں سیکڑوں مہم جوؤں کا خیرمقدم کرتا ہے ، جب درجہ حرارت گرم ہوتا ہے اور ہوائیں عام طور پر پرسکون ہوتی ہیں۔