ббPresidenti amerikan Donald Trump deklaroi të premten se gjatë kësaj jave i kishte thënë kryeministrit izraelit Benjamin Netanyahu që duhet të sillet “mirë me banorët e Rripit të Gazës të rrethuar, të cilët po vuajnë”.

I pyetur nëse ka ngritur çështjen e dërgesës së ndihmave humanitare që Izraeli e ka bllokuar për më shumë se shtatë javë, Trump u tha gazetarëve në avionin presidencial Air Force One se gjatë një bisede telefonike të martën i kishte thënë Netanyahut: “Duhet të sillesh mirë me Gazën.”

“Ata njerëz po vuajnë. Duhet të sillemi mirë me Gazën. Do të kujdesemi për këtë,” tha Trump, duke shtuar se “ka nevojë të madhe për ushqim dhe ilaçe, dhe ne do ta zgjidhim këtë.”

I pyetur nëse administrata e tij po ushtron presion ndaj Izraelit për të lejuar dërgesat e ushqimit dhe ilaçeve, Trump u përgjigj: “Po, po e bëjmë.”

Më herët të premten, Programi Botëror për Ushqim (WFP) njoftoi se ka “shteruar të gjitha rezervat ushqimore” për familjet në Gaza, pasi kalimet kufitare kanë mbetur të mbyllura nga Izraeli që nga 2 marsi.

Agjencia e OKB-së bëri të ditur se të gjitha 25 furrat që mbështeste kanë ndërprerë punën më 31 mars për shkak të mungesës së miellit dhe lëndëve djegëse për gatim. Pakot ushqimore të ndara për familjet u konsumuan po atë javë. WFP paralajmëron për “mungesë serioze të ujit të sigurt dhe gazit për gatim, duke detyruar njerëzit të kërkojnë çfarëdo materiali të djegshëm për të përgatitur ushqim.”

Gaza po përballet me bllokadën më të gjatë të pikave kufitare kryesore në histori, pa hyrje të ndihmave humanitare apo furnizimeve tregtare për më shumë se shtatë javë. WFP thotë se çmimet e ushqimit janë rritur deri në 1.400 për qind krahasuar me periudhën e armëpushimit, ndërsa nevojat bazë për jetesë mungojnë totalish, duke shkaktuar “shqetësim serioz për ushqyerjen” e grupeve të cënueshme, përfshirë fëmijët, gratë shtatzëna, nënat gjidhënëse dhe të moshuarit.

Më shumë se 116.000 tonë metrikë ushqim, sasi e mjaftueshme për të ushqyer një milion njerëz për katër muaj, janë gati për të hyrë sapo të hapen kufijtë, njoftoi agjencia.