Një avion luftarak izraelit ka hedhur aksidentalisht një bombë pranë vendbanimit hebre Nir Yitzhak në kufirin me Gazën të martën për shkak të një "mosfunksionimi teknik" ndërsa ishte rrugës për të goditur objektivat në enklavën palestineze, tha ushtria izraelite.

Ushtria tha se bomba ra në një zonë të hapur pranë vendbanimit, duke shtuar se nuk pati të lënduar dhe se është duke u zhvilluar hetim.

Banorët vendas i kanë thënë të përditshmes Yedioth Ahronoth se nuk kanë vënë re asgjë të pazakontë pasi janë mësuar të dëgjojnë shpërthime të shpeshta nga aktiviteti ushtarak në Gaza. 

Ata kanë dëgjuar një shpërthim, por nuk kanë ngritur dyshime.

Ky nuk ishte incidenti i parë i tillë që nga fillimi i gjenocidit të Izraelit në Gaza. 

Në qershor 2024, një predhë tanku që synonte Gazën doli nga rruga dhe ra në territorin izraelit pranë gardhit kufitar.

Një muaj më herët, një bombë 500 kilogramë e hedhur nga një avion luftarak F-15 u gjet e pashpërthyer midis shtëpive në Moshav Yated në rajonin Eshkol, një ngjarje që ushtria e quajti "të jashtëzakonshme, të rrallë dhe të rrezikshme".

Ushtria izraelite rifilloi sulmet vdekjeprurëse në Gaza më 18 mars, duke thyer një marrëveshje armëpushimi dhe shkëmbimi të të burgosurve që hyri në fuqi në janar.

Të paktën 51.000 palestinezë, shumica prej tyre gra dhe fëmijë, janë vrarë në Gaza nga sulmet brutale izraelite që nga tetori 2023.

Gjykata Ndërkombëtare Penale lëshoi urdhraarresti nëntorin e kaluar për kryeministrin izraelit Benjamin Netanyahu dhe ish-ministrin e tij të Mbrojtjes Yoav Gallant për krime lufte dhe krime kundër njerëzimit në Gaza.

Izraeli gjithashtu përballet me një padi gjenocidi në Gjykatën Ndërkombëtare të Drejtësisë për luftën e tij në enklavën palestineze.