Një ish-vend adhurimi për myslimanët në verilindje të Francës është vandalizuar, ku janë përdhosur kopje të Kuranit të Shenjtë, janë vizatuar simbole të svastikës në mure dhe janë gjetur shenja të një tentative për zjarrvënie, raportuan mediat lokale.

Sulmi ka pasur në shënjestër një ndërtesë në L’Hôpital, pranë Saint-Avold në rajonin Moselle, e cila më parë ishte nën administrimin e shoqatës myslimane Les Amis du peuple méditerranéen, sipas gazetave Le Républicain Lorrain dhe burimeve të tjera.

Edhe pse nuk përdoret më si xhami që nga viti 2021 për shkak të problemeve me rregulloret e sigurisë, objekti vazhdon të jetë në pronësi të shoqatës.

Sipas drejtuesve të shoqatës, qilimat e faljes janë shqyer, mobiliet janë përmbysur, ndërsa në vendngjarje janë gjetur bombola gazi, goma dhe bidonë të mbushur me benzinë, duke sugjeruar një përpjekje për ta djegur ndërtesën.

Përfaqësuesit e shoqatës nuk e kishin vizituar ndërtesën për tri javë para datës 27 maj, duke sjellë paqartësi rreth kohës së saktë kur ndodhi vandalizmi.

Ekipet forenzike të policisë kanë kryer hetime dhe është paraqitur një ankesë zyrtare.

“Ky akt i neveritshëm dhe racist godet në zemër të kohezionit tonë shoqëror,” tha Tristan Atmania, një këshilltar komunal, duke kërkuar që autorët të vihen përpara drejtësisë.

Kryetari i bashkisë, Emmanuel Schuler, e dënoi sulmin si “të papranueshëm dhe të patolerueshëm.”

Ngjarja ka shkaktuar zemërim të gjerë në rrjetet sociale dhe vjen në një kohë me rritje të shqetësimeve për aktet anti-myslimane në Francë.

Vetëm një muaj më parë, shtetasi 22-vjeçar nga Mali, Aboubakar Cisss, u vra me thikë brenda xhamisë Khadija në La Grand-Combe (Gard), një incident që shtoi më tej shqetësimet e komuniteteve myslimane në të gjithë vendin.

Autoritetet ende nuk i kanë identifikuar autorët e këtij sulmi të fundit.