Ushtria izraelite tha të mërkurën se kishte formuar një korridor të ri që kalonte nëpër qytetin Khan Younis në Rripin jugor të Gazës.

Korridori, i quajtur "Magen Oz", shtrihet rreth 15 kilometra dhe ndan pjesën lindore dhe atë perëndimore të Khan Younisit, thuhet në njoftimin e ushtrisë.

“Ky korridor, me gjatësi rreth 15 kilometra, shërben si komponent kyç për të ushtruar presion ndaj Hamasit dhe për të arritur një disfatë vendimtare të brigadës së tij në Khan Younis,” pretendon ushtria.

Deri më tani, ushtria izraelite ka krijuar korridorin Netzarim, që ndan Gazën veriore nga pjesa tjetër e Rripit, korridorin Filadelfi përgjatë kufirit mes Gazës dhe Egjiptit, dhe korridorin Morag, që ndan Rafahun nga Khan Younisi.

Kryeministri izraelit Benjamin Netanyahu po i përdor këto korridore si justifikim për të ndaluar negociatat indirekte me Hamasin, duke këmbëngulur në ruajtjen e tyre për të vazhduar shkatërrimin e Gazës, ndërkohë që lëvizja palestineze ka pranuar propozimet e mëparshme dhe ka kërkuar tërheqjen e ushtrisë izraelite nga i gjithë territori.

Duke refuzuar thirrjet ndërkombëtare për armëpushim, Izraeli ka ndërmarrë sulme brutale ndaj Gazës që nga fundi i tetorit 2023, duke vrarë pothuajse 58.500 palestinezë, shumica gra dhe fëmijë.

Bombardimet e pamëshirshme kanë shkatërruar enklavën dhe kanë shkaktuar mungesë të ushqimit dhe përhapje sëmundjesh.

Në nëntor të vitit të kaluar, Gjykata Penale Ndërkombëtare lëshoi urdhërarreste për kryeministrin izraelit Benjamin Netanyahu dhe ish-ministrin e Mbrojtjes Yoav Gallant për krime lufte dhe krime kundër njerëzimit në Gaza.

Izraeli gjithashtu po përballet me një padi për gjenocid në Gjykatën Ndërkombëtare të Drejtësisë për luftën në enklavën palestineze.