Delegacioni përfaqësues i Ushtrisë Turke në Kosovë (KFOR-i Turk) ka rinovuar kuzhinën dhe sallën e ngrënies në Qendrën Burimore për Mësim dhe Këshillim "Nënë Tereza", e njohur edhe si shkolla e personave me probleme në të folur dhe dëgjim.
Në ceremoninë e hapjes së mbajtur në shkollë morën pjesë ambasadori i Türkiyes në Prishtinë, Sabri Tunç Angılı, kryetari i Partisë Demokratike Turke të Kosovës (KDTP), njëherësh ministër në detyrë i Zhvillimit Rajonal, Fikrim Damka, konsulli i përgjithshëm i Türkiyes në Prizren, Celal Doğan, kryetari i KFOR-it Turk, kolonel Harun Elitaş, si dhe përfaqësues të organizatave turke dhe lokale në vend, mësues dhe nxënës.
Në fjalimin e tij në ceremoni, ambasadori Angılı tha se baza e marrëdhënieve midis Türkiyes dhe Kosovës është mbështetja e ekzistencës së Kosovës si një shtet i pavarur, sovran dhe i vetëmbështetur përgjithmonë. Ai tha se Türkiye do të vazhdojë ta mbështesë Kosovën me të gjitha institucionet e saj.
“Mendoj se Kosova, e cila ka popullsinë më të re në Evropë, ka një potencial jashtëzakonisht të madh dhe bazuar në këtë potencial, ka mundësi që mund ta çojë në një të ardhme edhe më të mirë”, tha ambasadori turk Angılı.
Duke theksuar se ata vazhdojnë të kontribuojnë në miqësinë midis Türkiyes dhe Kosovës, koloneli Elitaş tha se si delegacion përfaqësues turk, ata i kushtojnë rëndësi të madhe përmirësimit të cilësisë së jetës së individëve me nevoja të veçanta në Kosovë, duke mbështetur arsimimin e tyre dhe duke kontribuar në zhvillimin e individëve që shikojnë drejt së ardhmes me shpresë.
Damka, nga ana e tij, tha se përveç kontributeve të ushtrisë turke në sigurinë e Kosovës, ata ofrojnë edhe mbështetje të ndryshme për zhvillimin dhe përparimin drejt së ardhmes.
Pas fjalimeve, u pre shiriti i hapjes së projektit dhe të ftuarit panë nga afër kuzhinën dhe sallën e ngrënies.
Kuzhina dhe salla e ngrënies së Shkollës “Nënë Tereza” për personat me dëmtime në dëgjim dhe në të folur u rinovua dhe u pajis me pajisjet e nevojshme në kuadër të aktiviteteve të bashkëpunimit civilo ushtarak.
Ushtria turke vazhdon të shërbejë në Kosovë në kuadër të KFOR-it që nga viti 1999.
