Forcat izraelite arrestuan të premten myftiun e madh të Jerusalemit dhe Palestinës, Sheik Muhammad Hussein, brenda kompleksit të xhamisë Al-Aksa në Jerusalemin e pushtuar, menjëherë pas mbajtjes së hytbes së së premtes, sipas Departamentit të Vakëfeve Islame.

Departamenti raportoi se policia izraelite e ndaloi Sheik Husseinin pranë Portës Mughrabi, menjëherë pas predikimit të tij.

Dëshmitarët thanë se forcat izraelite bastisën dhomën e altoparlantëve të xhamisë dhe ndaluan Sheikun pasi ai dënoi në predikim politikën e urisë të zbatuar nga qeveria izraelite kundër popullit palestinez në Rripin e Gazës.

Mijëra besimtarë morën pjesë në faljen e së premtes në xhaminë Al-Aksa mes masave të ashpra ushtarake izraelite që kufizuan hyrjen në vendin e shenjtë.

Agjencia zyrtare palestineze e lajmeve Wafa raportoi se forcat izraelite penguan hyrjen e besimtarëve përmes Portës së Damaskut dhe asaj të Luanëve, u kontrolluan dokumentet e identitetit, u arrestuan disa të rinj dhe u ndalua hyrja e tyre në xhami.

Kufizimet për hyrje në Al-Aksa janë në fuqi që nga fillimi i luftës gjenocidale në Gaza më 7 tetor 2023, me masa edhe më të ashpra zakonisht gjatë ditëve të premte.

Ndërkohë, ushtria izraelite dhe kolonët e paligjshëm kanë shtuar sulmet në Bregun Perëndimor të pushtuar kundër palestinezëve, vendeve të tyre të shenjta dhe pronave, përfshirë edhe në Jerusalemin Lindor, duke vrarë të paktën 1,006 palestinezë dhe plagosur mbi 7,000 të tjerë.

Xhamia Al-Aksa është vendi i tretë më i shenjtë për myslimanët në botë. Hebrenjtë e quajnë këtë zonë "Mali i Tempullit", duke pretenduar se aty ndodheshin dy tempujt e lashtë hebrenj.

Izraeli pushtoi Jerusalemin Lindor gjatë luftës arabo-izraelite të vitit 1967 dhe e aneksoi të gjithë qytetin në vitin 1980 – veprim ky që nuk është njohur kurrë nga bashkësia ndërkombëtare.