Presidenti i Shteteve të Bashkuara të Amerikës, Donald Trump, deklaroi të enjten se vëmendja e ringjallur ndaj çështjes së Jeffrey Epsteinit është një “mashtrim” politik, që sipas tij është ideuar nga demokratët për ta minuar administratën e tij. Në një postim në platformën e tij Truth Social, ai e përshkroi këtë si “një tjetër mashtrim Rusia, Rusia, Rusia”.

“Radikalët e majtë-demokratë po bëjnë gjithçka për të shpërqendruar dhe për të errësuar gjashtë muajt tanë madhështorë në shërbim të Amerikës,” shkroi Trump, duke e quajtur këtë periudhë “gjashtë muajt më të mirë në historinë presidenciale”.

Duke e cilësuar aferën e Epsteinit si “mashtrim i demokratëve”, Trump bëri thirrje për publikimin e të gjitha dokumenteve të jurisë së madhe që lidhen me këtë çështje, duke thënë: “Të gjithë duhet të shohin çfarë përmbajnë, por njerëzit e pafajshëm nuk duhet të dëmtohen.”

Trump përsëriti kritikat e vjetra ndaj hetimeve të mëparshme që e kishin në shënjestër, duke e krahasuar çështjen Epstein me hetimet për ndërhyrjen ruse në zgjedhje dhe akuzat ndaj administratës së tij.

Komentet e tij vijnë mes spekulimeve në rritje për mundësinë e zbardhjes së dokumenteve gjyqësore të lidhura me rrjetin kriminal të Epsteinit, i cili sipas mediave përfshinte figura me ndikim nga politika, biznesi dhe media.

Megjithëse Trump ishte parë më herët në shoqërinë e Epsteinit, ai ka mohuar çdo lidhje me krimet e tij.

Jeffrey Epstein, i dënuar për krime seksuale, u gjet i vdekur në qelinë e burgut në vitin 2019 ndërsa po priste gjyqin për trafik njerëzor për qëllime shfrytëzimi seksual. Vdekja e tij u shpall zyrtarisht vetëvrasje, por nxiti teori të shumta konspirative dhe vëmendje të shtuar publike për shkak të lidhjeve të tij me figura të fuqishme.

Interesimi i rikthyer vjen pas përpjekjeve të avokatëve të viktimave dhe gazetarëve për të publikuar dokumente gjyqësore ende të pazbuluara.