Një adoleshent palestinez vdiq të premten nga plagët e shkaktuara nga të shtënat me armë zjarri izraelite gjatë një bastisjeje ushtarake në një kamp refugjatësh në qytetin verior të Bregut Perëndimor, Nablus, në fillim të kësaj jave, sipas agjencisë zyrtare palestineze të lajmeve Wafa.

Wafa raportoi, duke cituar burime mjekësore, se "Mohammed Khaled Hassan Mabrouk, 14 vjeç, vdiq nga plagët kritike në kofshë të pësuara gjatë një bastisjeje të ushtrisë izraelite në kampin e refugjatëve Al-Ain në perëndim të Nablusit të mërkurën".

Ushtria izraelite sulmoi Nablusin dhe kampin Al-Ain atë ditë, duke ndaluar të paktën një palestinez dhe duke plagosur disa të tjerë, sipas burimeve lokale dhe mjekësore.

Në një incident të veçantë të premten herët, dhjetëra kolonë të paligjshëm izraelitë hynë në pjesën lindore të Nablusit për të kryer rituale fetare në vendin e njohur si Varri i Jozefit përpara se të largoheshin nga forcat palestineze të sigurisë.

Dëshmitarë okularë janë shprehur se "një autobus dhe një automjet tjetër transportuan kolonë të paligjshëm në Varrin e Jozefit pa asnjë shoqërim nga ushtria izraelite".

Forcat palestineze të sigurisë i ndaluan kolonët e paligjshëm te varri dhe i penguan ata të hynin në vend përpara se t'ia dorëzonin palës izraelite.

Pamjet që qarkulluan në mediat sociale treguan kolonë të paligjshëm të mbledhur te varri, i cili ndodhet në Zonën A, nën kontrollin e plotë palestinez.

Çifutët  besojnë se hapësira është vendi i varrimit të profetit Jozef, themeluesit të fisit izraelit me të njëjtin emër. 

Megjithatë, shumë arkeologë e kundërshtojnë këtë pretendim, duke deklaruar se është varri i një kleriku mysliman vendas të quajtur Yusuf Dweikat.

Kolonët e paligjshëm zakonisht hyjnë në zonë nën mbrojtje të rëndë ushtarake izraelite, duke shkaktuar shpesh përleshje me palestinezët vendas.

Ushtria izraelite gjithashtu kreu disa bastisje gjatë natës në të gjithë Bregun Perëndimor të pushtuar herët të premten, duke arrestuar disa palestinezë, sipas burimeve lokale.

Që nga fillimi i luftës gjenocidale të Izraelit në Rripin e Gazës në tetor 2023, të paktën 1.006 palestinezë janë vrarë dhe më shumë se 7.000 janë plagosur në Bregun Perëndimor nga forcat izraelite dhe kolonët e paligjshëm, sipas Ministrisë Palestineze të Shëndetësisë.

Në një vendim historik korrikun e kaluar, Gjykata Ndërkombëtare e Drejtësisë e shpalli të paligjshëm pushtimin e territorit palestinez nga Izraeli. Ajo kërkoi evakuimin e të gjitha vendbanimeve në Bregun Perëndimor dhe në Jerusalemin Lindor.