Të mërkurën, në gjithë Austrinë u mbajt një minutë heshtjeje kombëtare, pikërisht në kohën kur ndodhi sulmi vdekjeprurës në një shkollë të mesme në qytetin Graz.

Në të shtënat që ndodhën të martën në një shkollë në qytetin Graz të Austrisë, humbën jetën 11 persona, përfshirë shtatë nxënës, një mësues dhe sulmuesi i dyshuar, sipas të dhënave të policisë lokale.

Sulmi ndodhi në shkollën që ndodhet në rrugën Dreierschutzengasse rreth orës 10:00 sipas kohës lokale, duke shkaktuar një evakuim të menjëhershëm. Nxënësit u dërguan në afërsi, në sallën Helmut-List-Halle, ku iu ofrua ndihmë psikologjike nga specialistë emergjentë dhe stafi i Kryqit të Kuq.

Policia njoftoi se dymbëdhjetë persona janë plagosur, disa prej tyre rëndë.

Sulmuesi, i identifikuar si një 22-vjeçar austriak nga rajoni i Grazit, ishte ish-nxënës i kësaj shkolle, por nuk kishte diplomuar, tha për gazetarët ministri i Brendshëm, Gerhard Karner.

Austria ka shpallur zie kombëtare treditore, që ka nisur të mërkurën në mëngjes.