Forcat izraelite bastisën sonte anijen e ndihmave “Handala” që po shkonte për në Gaza, në të cilën gjendeshin 21 persona, treguan pamjet nga një transmetim i drejtpërdrejtë.

Transmetimi i drejtpërdrejtë kapi momentin kur ushtarët izraelitë  të armatosur bastisën anijen dhe i urdhëruan aktivistët të ngrinin duart.

“Handala u ndalua”, njoftoi Koalicioni i Flotiljes së Lirisë në Telegram.

Ema Fourreau, një nga aktivstët që u nis për në Gaza, njoftoi fillimin e ndërhyrjes në anije duke shkruar në X: "Ushtria izraelite është këtu. Shihemi së shpejti. Fund gjenocidit”.

Fati i ekuipazhit të anijes mbetet i panjohur, pasi transmetimi i drejtpërdrejtë u ndërpre papritur gjatë bastisjes.

Më parë, “Handala” kishte lëshuar një thirrje për ndihmë ndërsa forcat detare izraelite po afroheshin. Anija, e cila u nis nga Italia, po transportonte formulë për foshnja, ushqim dhe ilaçe në përputhje me ligjin ndërkombëtar detar dhe humanitar. Në bord gjendeshin civilë të paarmatosur, përfshirë ligjvënës, mjekë dhe vullnetarë.