Garda Revolucionare e Iranit (IRGC) ka deklaruar se ka përdorur metoda të reja për të çrregulluar sistemet shumë-shtresore të mbrojtjes izraelite gjatë valës së tetë të operacioneve të hënën, duke bërë që këto sisteme të godasin njëra-tjetrën.
IRGC-ja tha se kapacitetet e përmirësuara në fushën e inteligjencës dhe pajisjeve të përdorura në sulmin, që ishte “më i fuqishëm dhe më shkatërrimtar se më parë”, shkaktuan mosfunksionim të sistemeve mbrojtëse izraelite.
“Sistemet shumë-shtresore të mbrojtjes të armikut u çrregulluan në atë masë, saqë sistemet e mbrojtjes së regjimit goditën njëra-tjetrën”, thuhet në deklaratë.
IRGC shtoi se inovacionet e tyre bënë të mundur që goditjet me raketa të arrinin në maksimum objektivat, pavarësisht “mbështetjes gjithëpërfshirëse të ShBA-së dhe Perëndimit” ndaj teknologjive mbrojtëse të Izraelit.
Irani e përshkroi këtë operacion si përmbushje të premtimeve të dhëna nga komandantët e tyre tashmë të vrarë dhe tha se tregoi që “llogaritjet dhe vlerësimet e armikut cionist dhe amerikanëve kundër Iranit Islamik ishin krejtësisht të gabuara.”
IRGC-ja paralajmëroi se operacionet “efektive, të synuara dhe më shkatërrimtare” kundër objektivave jetike të “regjimit të rremë” do të vazhdojnë deri në “shkatërrimin e tij të plotë.”
Sulmet vranë dhe plagosën dhjetëra persona të hënën, duke përshkallëzuar konfliktin që nisi kur forcat izraelite sulmuan fillimisht Iranin në orët e para të mëngjesit të së premtes, duke goditur objekte bërthamore dhe raketore dhe duke vrarë komandantë dhe shkencëtarë të lartë ushtarakë.
