Sistemi shëndetësor në Gazë është “në pikën e shpërthimit”, paralajmëroi të martën Organizata Botërore e Shëndetësisë (OBSh), pasi operacionet ushtarake, zhvendosjet masive dhe bllokimi i ndihmave humanitare po e çojnë drejt kolapsit të plotë shërbimin mjekësor në të gjithë Rripin e Gazës.

“Ndërsa vëmendja globale po zhvendoset drejt tensioneve në rritje midis Iranit dhe Izraelit, Gaza vazhdon të shkatërrohet kryesisht jashtë syve të botës, por jo jashtë rrezikut”, deklaroi Richard Peeperkorn, përfaqësues i OBSh-së në territoret palestineze të pushtuara, gjatë një informimi në OKB në Gjenevë.

Aktualisht, vetëm 17 nga 36 spitalet e Gazës funksionojnë pjesërisht, ndërsa vetëm katër përfshirë Kompleksin Mjekësor Nasser janë qendra referimi për trajtime më të avancuara.

“Sistemi shëndetësor thjesht nuk mund të përballojë humbjen e spitalit Nasser,” theksoi Peeperkorn. Ky spital, që ndodhet brenda një zone evakuimi të shpallur javën e kaluar, është “aktualisht ofruesi i vetëm i kujdesit intensiv (ICU) dhe kirurgjisë neurologjike në Khan Younis”, ndërsa njësia e dializës aty “po trajton mbi 200 pacientë”.

Në qytetin e Gazës, Spitali Al-Shifa po funksionon me një “mbipopullim në 200 për qind të kapacitetit të shtretërve”, ndërsa Spitali Al-Amal në Khan Younis është “aktualisht plotësisht i paarritshëm për shkak të operacioneve ushtarake përreth dhe nuk mund të pranojë raste të reja, duke u konsideruar kështu jofunksional”.

Mungesa e karburantit dhe furnizimeve mjekësore po ndikon rëndë në ofrimin e kujdesit. “Më shumë se 50 për qind e stokut mjekësor të OBSh-së në Gazë është ezauruar,” dhe “33 kamionë të OBSh-së presin në Al Arish dhe 15 në Bregun Perëndimor,” shtoi ai. 

“17 spitale, 7 spitale fushore dhe 43 qendra shëndetësore parësore që funksionojnë me minimumin e karburantit në ditë së shpejti do të mbesin pa karburant fare.”

Evakuimet mjekësore thuajse kanë ndaluar. 

“Që nga 18 marsi 2025, vetëm 6 evakuime mjekësore janë realizuar, ndërsa mbi 10,000 persona kanë nevojë për evakuim jashtë Gazës për trajtim.”

“Pa karburant,” paralajmëroi Peeperkorn, “të gjitha nivelet e kujdesit shëndetësor do të ndalen, duke shkaktuar më shumë vdekje dhe vuajtje të parandalueshme.”

Duke refuzuar thirrjet ndërkombëtare për armëpushim, ushtria izraelite ka vijuar me një ofensivë të ashpër ndaj Gazës që nga tetori i vitit 2023, duke vrarë mbi 55.400 palestinezë, shumica e të cilëve janë gra dhe fëmijë.