Të paktën 14 persona u vranë dhe 25 të tjerë u plagosën të martën në mëngjes, kur avionët luftarakë izraelitë kryen një sulm ndaj tendave ku ishin strehuar palestinezë të zhvendosur në kampin e refugjatëve Shati, në veri të Gazës, sipas burimeve mjekësore.

Sipas agjencisë zyrtare palestineze të lajmeve WAFA, viktimat, përfshirë gra dhe fëmijë, u transportuan në spitalin Shifa në qytetin e Gazës pas sulmit ajror të kryer para agimit.

Që nga tetori i vitit 2023, Izraeli ka vrarë më shumë se 59.000 palestinezë në Rripin e Gazës, shumica gra dhe fëmijë.

Sulmet kanë shkatërruar enklavën palestineze, kanë shembur sistemin shëndetësor dhe kanë shkaktuar një krizë të madhe humanitare.

Në nëntor të vitit të kaluar, Gjykata Ndërkombëtare Penale lëshoi urdhërarreste për kryeministrin izraelit Benjamin Netanyahu dhe ish-ministrin e mbrojtjes Yoav Gallant për krime lufte dhe krime kundër njerëzimit në Gaza.

Izraeli përballet gjithashtu me një padi për gjenocid në Gjykatën Ndërkombëtare të Drejtësisë për luftën në enklavë.