Një avion trajnues i Forcës Ajrore të Bangladeshit u rrëzua të hënën në një kampus kolegji në kryeqytetin Dhaka, duke shkaktuar vdekjen e të paktën 20 personave, përfshirë studentë dhe pilotin, njoftoi krahu mediatik i ushtrisë.

Sipas deklaratës së Shërbimeve të Marrëdhënieve të Përbashkëta (ISPR), 171 persona të tjerë u plagosën, shumica me djegie të rënda.

Shumica e viktimave janë studentë dhe staf i kolegjit, ndërsa piloti, Mohammad Towkir Islam Sagar, i cili ndodhej vetëm në avionin luftarak FT-7 BGI të prodhimit kinez, humbi gjithashtu jetën.

Qeveria e përkohshme shpalli ditën e martë ditë zie kombëtare pas aksidentit tragjik.

Sipas ISPR-së, avioni i Forcës Ajrore “pati një defekt mekanik” menjëherë pasi u ngrit nga baza ajrore AK Khandaker në zonën Kurmitola të Dhakës.

Piloti “u përpoq ta largonte avionin nga zona e populluar”, por ai u përplas me një ndërtesë dykatëshe të kolegjit Milestone në lagjen Diabari të Dhakës, thuhet në deklaratë.

Avioni goditi ndërtesën e kolegjit Milestone në lagjen Uttara, dhe pamjet treguan tym dhe flakë të mëdha që dilnin nga vendi i ngjarjes.

Md Selim Ahmed, një mësues në kolegj, i tha Anadolu-s se institucioni ka mbi 2.000 studentë, por nuk kishte informacion për numrin e viktimave nga brenda godinës.

ISPR-ja bëri të ditur se avioni u ngrit në orën 13:06 me orën lokale (07:06 GMT).

Ky është aksidenti ajror më vdekjeprurës në historinë e Bangladeshit, që nga viti 2018 kur dy pilotë të Forcës Ajrore humbën jetën në një tjetër aksident trajnues në rajonin jugperëndimor të Jessore-s.