Grupi Huthi në Jemen pretendoi të hënën se ka kryer sulme me dronë ndaj pesë objektivave izraelite, pak kohë pasi Izraeli ndërmori sulme ajrore ndaj portit Al Hudaydah në perëndim të Jemenit.

Radioja Ushtarake izraelite tha se një dron u rrëzua nga Forcat Ajrore izraelite. Asnjë sirenë alarmi ajror nuk u aktivizua nga prania e dronit.

Ndërsa ushtria izraelite nuk ka dhënë një deklaratë zyrtare mbi origjinën e dronit, kanali Channel 13 dhe media të tjera izraelite raportuan se vlerësimet fillestare ushtarake tregojnë se droni ishte lëshuar nga Jemeni.

Nga ana e saj, grupi Huthi konfirmoi sulmet me dronë ndaj pesë objektivave izraelite, përfshirë Aeroportin Ben Gurion në Tel Aviv.

Zëdhënësi ushtarak i Huthive, Yahya Saree, tha se sulmet që kishin në shënjestër gjithashtu Portin Eilat, Aeroportin Ramon dhe një objektiv në Ashdod, goditën me sukses objektivat e synuara.

Sulmet ndodhën vetëm disa orë pasi Ministri i Mbrojtjes së Izraelit, Israel Katz, deklaroi të hënën se forcat izraelite kishin goditur portin Al Hudaydah. Këto ishin sulmet ajrore të 12-ta të Izraelit në Jemen që nga tetori i vitit 2023.

Huthit kanë shtuar sulmet me raketa dhe dronë ndaj Izraelit që kur forcat izraelite rifilluan ofensivën në Gaza në mars, pas dy muajsh armëpushimi të brishtë.

Që nga nëntori i vitit 2023, grupi ka sulmuar gjithashtu anije tregtare në Detin e Kuq, Gjirin e Adenit dhe Detin Arabik në mbështetje të palestinezëve në Gaza, ku nga ofensiva izraelite janë vrarë gati 59.000 persona.