Ministria e Punëve të Jashtme e Türkiyes iu përgjigj shpalljes së dy parqeve detare nga Greqia në detet Egje dhe Jon, duke nënvizuar se “veprimet e njëanshme duhet të shmangen në zona detare të mbyllura ose gjysmë të mbyllura, siç janë Egjeu dhe Mesdheu”.

Ministria theksoi se iniciativa e shpallur nga Greqia vitin e kaluar nuk do të ketë pasoja ligjore, veçanërisht për shkak të moszgjidhjes së çështjeve në Egje midis dy vendeve, përfshirë karakteristikat gjeografike për të cilat sovraniteti nuk i është dhënë Greqisë nga traktatet ndërkombëtare.

Në deklaratën e saj të datës 9 prill 2024, Türkiye kishte përsëritur këtë qëndrim, dhe vuri në dukje se pikëpamjet e shprehura atëherë mbeten të vlefshme edhe sot.

“E drejta ndërkombëtare detare inkurajon bashkëpunimin, përfshirë edhe për çështjet mjedisore, ndërmjet shteteve bregdetare në dete të mbyllura ose gjysmë të mbyllura. Në këtë kontekst, ritheksojmë se Türkiye mbetet e gatshme për bashkëpunim me Greqinë, si një nga dy shtetet bregdetare të Detit Egje”, thuhej në deklaratën e së hënës.

Ministria nënvizoi se përpjekjet për të shfrytëzuar vlera universale si mbrojtja e mjedisit, përmes çështjeve të ndërlidhura në Egje dhe statusit të disa ishujve, shkëmbinjve dhe shkëmbinjve të vegjël, sovraniteti i të cilëve nuk i është dhënë Greqisë me traktate ndërkombëtare, nuk do të kenë asnjë efekt ligjor sot, ashtu siç nuk kanë pasur në të kaluarën.

“Türkiye do të shpallë projektet e saj për mbrojtjen e mjedisit në zonat e saj detare në ditët në vijim”, shtohej më tej.

Në fund, deklarata theksoi qëndrimin e Türkiyes se një qasje e sinqertë dhe gjithëpërfshirëse duhet të adoptohet për zgjidhjen e çështjeve bazuar në të drejtën ndërkombëtare, barazi dhe fqinjësi të mirë, në përputhje me Deklaratën e Athinës të datës 7 dhjetor 2023, e cila përparëson dialogun dhe pasqyron frymën që të dyja palët synojnë të ruajnë në marrëdhëniet turko-greke.