Eýranyň Daşary işler ministri Tähranyň ABŞ-nyň soňky howa hüjümleri sebäpli emele gelen uly zeperlere garaamzdan ýadro programmasyndan ýüz öwürmejekdigini aýtdy. Urany baýlaşdyrmagyň milli buýsanç meselesidigini aýtdy.
Eýranyň Daşary işler ministri Abbas Arakçi "Fox News" habarlar gullugyna beren beýanatynda "Häzirlikçe baýlaşdyrmak bes edildi, sebäbi zyýan uly we agyr. Emma, açyk ýagdaýda aýtmak islesek, baýlaşdyrmakdan ýüz öwrüp bilmeris, sebäbi bu öz alymlarymyzyň gazanan üstünlikidir" diýdi.
Arakçi geljekdäki islendik ýadro şertnamasynyň Eýranyň baýlaşdyrmak hukugyny öz içine almalydygyny aýtdy.
Arakçi beýanatyny ABŞ-nyň 22-nji iýunda üç sany ýadro desgasyna, şol sanda ýerasty Fordo desgasyna howa hüjüminden birnäçe hepde soň berdi. Bu hüjümler Ysraýylyň Eýran bilen 12 günlük söweşine jogap hökmünde amala aşyryldy.
Desgalara "uly zeper ýetendigini" boýun alýan Arakçi, Eýranyň ýadro tejribesiniň häzirki wagtda hem berkdigini aýtdy. Arakçi: "Tehnologiýa şu ýerde. Ýadro programmamyz, baýlaşdyryş programmamyz bomba bilen ýok edilip bilinjek daşary ýurtlardan getirilen zat däl" diýip nygtady.
