Jynsy zorluk taýdan jenaýat eden Jeffri Epşteýniň ýakyn ýoldaşy bolan Gislen Makswell, ABŞ-nyň Wekiller mejlisiniň Gözegçilik we hökümet özgertmeler komitetinde görkezme bermek üçin prokuraturadan eldegrilmesizlik isledi.

Respublikan wekil Jeýms Komeriň baştutanlygyndaky komitet 11-nji awgustda Florida ştatynyň Tallahassi şäherindäki tussaghanada görkezme almagy meýilleşdirilýär. Gislen Makswell, alan 20 ýyllyk jezasyny şol tussaghanada geçirýär.

Gislen Makswell, 2021-nji ýylda dawa-jenjellerde ady geçen maliýeleşdiriji Epşteýniň ýaş gyzlara jyns taýdan zorlukda kömek etmekde günäkär tapyldy.

Aklawçysy Dewid Markus, Jeýms Komere ýazan hatynda: "Syýasy taýdan duýgur şertlerde resmi eldegrilmesizlik bilen müşderim mundan beýläk jenaýat töwekgelçiligini edip bilmez" diýdi.

Markus şaýatlyk etmek üçin goşmaça şertleri hem talap etdi: Görkezme tussaghananyň içinde alynmaly we komitet soraglary öňünden bermeli.

Iňlis jemgyýetçilik toparynyň agzasy we Epşteýniň öňki söýgülisi bolan Makswell günäsi geçilen halatynda aç-açan beýanat berip biljekdigini aýtdy.

Makswell häzirki wagtda özüne bildirilen hökümi ABŞ-nyň Ýokary kazyýetine şikaýat etmäge taýýarlyk görýär.

Ozal Epşteýn bilen baglanşykly hiç hili ýalňyş hereket etmändigini öňe süren ABŞ-nyň Prezidenti Donald Tramp, Makswelliň günäsini geçmek islemeýändigini aýtdy.

Tramp 1990-njy ýyllarda we 2000-nji ýyllaryň başynda Epşteýni tanaýandygyny, ýöne Epşteýniň ölüminden birnäçe ýyl öň gatnaşyklaryny kesendigini öňe sürdi.

Epşteýn 2019-njy ýylda Nýu-Ýorkdaky tussaghanada ýaş gyzlary jyns taýdan zorlamakda aýyplanyp, kazyýet işine garaşýarka öz janyna kast etdi.

Kongresdäki demokratlar we Trampyň käbir tarapdarlary Epşteýn we Makswell bilen baglanyşykly resminamalaryň doly çykarylmagy üçin basyşlaryny dowam etdirýärler.