Parij – dön'yanıñ moda başqalası ğına tügel, ul xuşbuy yaratuçılar öçen dä möhim urın. Här yıl yaqınça 100 million qunaq qabul itüçe bu şähärneñ tirän tamırlı parfyumeriya tarixı bar häm anda säyäxät qılıp, xuşbuy satıp alu häm xätta üz maxsus islemayıñnı buldıru öçen bik küp mömkinleklär täq’dim itä.

Ozaq yıllar kamil, ideal is êzläwçe xuşbuy kollekśionerı bularaq, dön'yanıñ iñ abruylı parfyumeriya üzägenä baru ideyäse mine härwaqıt qızıqsındırdı.

Säyäxätem aldınnan, xuşbuy yaratqan keşelär barırğa tiyeşle iñ möhim urınnarnı tabu öçen tikşerenülär ütkärdem. Parijda parfyumeriya dön’yasına säyäxät itü öçen kiräkle mäğ’lümatlarnı cıydım.

Xäzerge waqıtta telägän xuşbuynı internet aşa satıp alırğa mömkin, läkin xuşbuy dön’yasına tirän çumıp iskitkeç islär belän tanışırğa telisez ikän bu tuqtalışlar sezneñ öçen.  

Galeries Lafayette Haussmann: xuşbuy moğcizaları dön’yası

Xuşbuy säyäxätenä kereşü öçen iñ yaxşı urınnarnıñ berse  – Parij üzägendä urnaşqan Galeries Lafayette Haussmann säwdä üzäge. Biredä Guerlain, Chanel, Dior kebek lyuks markalarnıñ xuşbuy butikları bar. Ägär iñ üzençälekle islärne ber urında kürergä telisez ikän, bu urın – sezneñ öçen.

Niche Perfumery: siräk oçrıy torğan üzençälekle islär

Ğädäti xuşbuylar belän genä qänäğat’länmäwçelär Jovoy häm Nose butiklarına bara ala.  Bu butiklarda Stephane Humbert Lucas, Xerjoff, Orto Parisi, Nishane kebek markalar täq’dim itelä.

Äğär dä sez ğädäti bulmağan täcribä êzlisez ikän, Dover Street Market Paris kibetenä keregez. Bu kibettä sez başqalarında oçrata almağan avangard islärne taba alasız.  

 Fragonard xuşbuy muzeyı: is tarixına säyäxät

Parfyumeriyanıñ tarixı häm ostalığın tiränräk añlarğa teläwçelär öçen Fragonard xuşbuy muzeyı – iñ yaxşı urın. Keçkenä, läkin bik täêsirle, iskitkeç bu butik - muzeyda borınğı ısullardan alıp xäzerge zamança texnologiyälärgä qadär xuşbuy dön’yasınıñ üseşen çağıldıruçı êksponatlar urnaştırılğan. Muzey säyäxäte axırında Fragonardnıñ maxsus êksklyuziv xuşbuyların satıp alu mömkinlege dä bar.

Parijda xuşbuy satıp alu: anı yaratuçılar öçen iñ yaxşı uramnar

Zäwıqlı butiklar urnaşqan uramnarnı belergä teläsägez, Rue Saint-Honoré häm Rue des Francs-Bourgeois tarafına yul totığız. Bu uramnarda Creed, Serge Lutens, Penhaligon’s, Balmain kebek abruylı parfyumeriya yortları urnaşqan. Bu uramnar sezne näfislek häm unikal’ islär dön’yasına iltä.  

Üzençälekle täcribä êzläwçelär öçen isä Officine Universelle Buly butiğın kiñäş itä alabız. 18 nçe ğasır Franśiyäsenä säyäxät itkändäy xis qaldıruçı bu butik, su nigezendä êşlängän islär, keşegä maxsus äzerlängän iren bal’zamnarı, taraqlar häm êstetik produkt dizaynnarı belän dan tota. Şu uq waqıtta sośial’ mediada da zur iğ’tibar cälep itüçe brend. 

Üz xuşbuyığıznı üzegez äzerlägez: ostaxanälär

Nigä xuşbuy satıp alu belän genä çiklänäsez? Nigä üzegezneñ xuşbuyığıznı buldırmıysız?

Parijda Molinard, Galimard häm Fragonard kebek abruylı markalar oyıştırğan xuşbuy yasaw ostaxanäläre bar. Anda xuşbuynıñ niçek êşlängänen, islärne ber-bersenä quşu sänğaten öyränä  häm sezne iñ yaxşı çağıldırğan xuşbuynı äzerli alasız. Bu - älege êşkä yaña ğına kereşüçelär öçen dä, täcribäle êntuziastlar öçen dä unikal’ mizgel.

Parij – xuşbuy yaratqan härkem öçen çın xıyal şähäre. Qupşı butiklardan  iskitkeç xuşbuy yortları, tarixi muzeylar, maxsus ostaxanälärgä qädär, şähär çiksez xuşbuy tabu mömkinlekläre täq’dim itä.

Parijğa kiläse kilüegezdä borınığız sezgä yul kürsätsen. Bälki şul waqıtqa qadär êzlägän kamil, ideal isle xuşbuyığıznı tabırsız!