BMT-nin humanitar məsələlər üzrə rəsmisi Qəzzada sürətlə dərinləşən humanitar böhranla bağlı xəbərdarlıq edərək bildirib ki, bölgədə hər üç nəfərdən biri günlərdir yemək yeməyib.

BMT Baş katibinin humanitar məsələlər üzrə müavini Tom Fletçerin sözlərinə görə, İsrailin bir həftəlik yardım artımını dəstəkləməsinə baxmayaraq, aclığın qarşısını almaq üçün daha genişmiqyaslı humanitar dəstəyə ehtiyac var.

“Qəzzada humanitar vəziyyət kritik həddə çatıb. Hər üç nəfərdən biri günlərlə heç bir qida qəbul etmir. İnsanlar sadəcə ailələrini doyurmaq üçün yemək axtararkən güllələnirlər”, – deyə Tom Fletçer rəsmi “X” hesabında bildirib.

İlkin məlumatlara əsasən, Qəzzaya daxil olmaq üçün 100-dən çox yardım maşını sərhəd keçidlərində gözləyir.

"Qıtlığın və sağlamlıq böhranının qarşısını almaq üçün dərhal və davamlı humanitar giriş təmin edilməlidir. Konvoyların keçidi sürətləndirilməli, sərhəd məntəqələrindən gündəlik çoxsaylı gediş-gəliş mümkün olmalı, müntəzəm yanacaq tədarükü və təhlükəsiz humanitar dəhlizlər təmin edilməlidir", – deyə Tom Fletçer qeyd edib.

O, həmçinin BMT-nin bütün əsirlərin qeyd-şərtsiz və dərhal azad olunması çağırışını bir daha təkrarlayıb.

Qeyd edək ki, İsrailin mühasirə altındakı Qəzzada həyata keçirdiyi hücumlar nəticəsində əksəriyyəti qadın və uşaq olmaqla təxminən 60 min fələstinli həyatını itirib.

Fələstinin rəsmi WAFA xəbər agentliyinin məlumatına görə, təxminən 11 min fələstinli dağıdılmış evlərin altında qalıb. Ekspertlər isə bildirirlər ki, ölənlərin real sayı Qəzza rəsmilərinin açıqladığı rəqəmlərdən daha çox ola bilər.

İsrailin həyata keçirdiyi hücumlar nəticəsində mühasirədəki ərazinin böyük hissəsi viran qoyulub, demək olar ki, bütün əhali didərgin düşüb.

2023-cü ilin noyabrında Beynəlxalq Cinayət Məhkəməsi İsrailin Baş naziri Benyamin Netanyahu və keçmiş müdafiə naziri Yoav Qallant barəsində Qəzzada hərbi cinayətlər və insanlığa qarşı cinayətlər törətmək ittihamı ilə həbs qərarı çıxarıb.