İsrailin Baş naziri Benyamin Netanyahu Ağ Evdə ABŞ prezidenti Donald Tramp ilə görüş zamanı bildirib ki, İsrail fələstinlilər üçün daha yaxşı gələcək vəd edə biləcək ölkələri müəyyən etmək məqsədilə ABŞ ilə birgə işləyir. Bu barədə B.Netanyahu jurnalistlərə açıqlamasında bildirib.

O, bəyan edib ki, İsrailin məhvinə çalışmayan fələstinlilərlə sülh mümkündür, lakin təhlükəsizlik baxımından suveren gücün həmişə İsrailin əlində qalmalı olduğunu vurğulayıb.

“Bəzi insanlar bizdən fələstinlilərə dövlət verməyimizi istəyirlər. Amma bu, bizim məhvimiz üçün bir platformaya çevrilə bilər,” – deyə Netanyahu qeyd edib.

Baş nazir həmçinin bildirib ki, “Həmas” 2023-cü il oktyabrın 7-dən sonra İsraildə de-fakto dövlət qurmağa cəhd edib, lakin İsrail bu cəhdi “dəf edib və dağıdıb”.

Görüş zamanı Netanyahu Donald Trampa onun Nobel Sülh Mükafatına namizəd göstərildiyini bildirən məktubu da təqdim edib.

D.Tramp isə çıxışında bildirib ki, “Həmas”ın atəşkəsə razılaşa biləcəyinə inanır.

İranla bağlı müzakirələr

Görüş zamanı liderlər İran məsələsini də müzakirə ediblər.

Donald Tramp bildirib ki, İsrail və İran arasında müharibənin sonlanacağına ümid edir və Tehrana qarşı tətbiq olunan sanksiyaların “uyğun zamanda” ləğv edilməsinə hazır olduğunu bir daha vurğulayıb.

ABŞ prezidenti gələn həftə İran rəsmiləri ilə danışıqların planlaşdırıldığını da təsdiqləyib:
“Biz İranla danışıqlar aparmaq istəyirik”, – deyə Donald Tramp bildirib.

Donald Trampın Yaxın Şərq üzrə xüsusi nümayəndəsi Stiv Vitkof isə görüşün “gələn həftə və ya yaxın günlərdə” baş tutacağını deyib.