ABŞ-ın ticarət naziri Hovard Lutnik bildirib ki, Londonda keçirilən ticarət danışıqları başa çatdıqdan sonra Çin mallarına tətbiq edilən cari tariflər qüvvədə qalacaq. Tramp bunu hər iki tərəf üçün “qələbə” adlandırıb və yekun təsdiqi gözləyən razılaşmanın əldə olunduğunu qeyd edib.
Vaşinqton və Pekin arasında ticarət sazişinin imzalanacağı gözləndiyi halda, ABŞ-ın ticarət naziri Hovard Lutnik ABŞ-ın Çin mallarına tətbiq etdiyi cari tariflərin eyni səviyyədə qalacağını bildirib.
İyunun 11-də CNBC telekanalının “Money Movers” proqramında ABŞ-ın cari tariflərinin gələcəkdə yenidən dəyişib-dəyişməyəcəyi sualına Lutnik “Bunu mütləq deyə bilərsiniz. Biz çox yaxşı vəziyyətdəyik. Çinlə işlərin gedişatından razıyıq" deyib.
Prezident Donald Tramp "Truth Social" platformasındakı paylaşımında deyib ki, ABŞ “ümumilikdə 55 faiz, Çin isə 10 faiz tarif tətbiq edir. Dəqiq maqnitlər və lazımi nadir torpaq elementləri Çin tərəfindən əvvəlcədən təmin ediləcək. Eyni şəkildə, Çin üçün qərara gəlinən şeyləri təmin edəcəyik. Buna Amerika universitetlərində təhsil alan çinli tələbələr də daxildir (bu mənim üçün həmişə yaxşı olub!).
Tarif məsələsi
Lutnik qeyd edib ki, 55 faizlik tariflərə fentanil üçün 20 faiz tarif, 10 faiz qarşılıqlı tarif və prezidentin birinci dövründən etibarən 25 faiz tarif nisbəti daxildir.
İyunun 11-də Londonda dünyanın iki ən böyük iqtisadiyyatı arasında ticarət danışıqları başa çatıb. Tramp ticarət razılaşmasının “tamamlandığını” və iki ölkənin prezidentləri tərəfindən yekun təsdiqinə tabe olduğunu bildirib. O, münasibətlərin əla olduğunu əlavə edib.
Tramp daha sonra “Çinin qapılarını Amerika ticarətinə açmaq” üçün Çin prezidenti Si Cinpinlə sıx işləyəcəyini söyləyib.
ABŞ prezidenti “Bu, hər iki ölkə üçün "böyük qələbə olacaq!!!” deyib.
Qeyd edək ki, ABŞ və Çin rəsmiləri tarif məsələsini müzakirə etmək üçün bu həftə Londonda görüşüblər.
Bundan əvvəl, aprel ayında ABŞ Çinə böyük tariflər tətbiq etməyə başlayıb, lakin may ayında ABŞ və Çin ilk 90 gün ərzində cəza tariflərinin geniş şəkildə geri götürülməsinə razılaşıblar.
