Prezident Rəcəb Tayyib Ərdoğan bu barədə iyunun 13-də (bu gün) rəsmi “X” hesabında paylaşdığı açıqlamada bildirib

Türkiyə prezidenti qonşu İrana edilən hücumları “beynəlxalq hüququn açıq şəkildə pozulması və təxribat xarakterli bir addım” kimi qiymətləndirib. O, bu hücumların İranla aparılan nüvə danışıqlarının intensivləşdiyi və İsrailin Qəzzadakı hərəkətləri ilə bağlı beynəlxalq təzyiqlərin artdığı bir vaxtda baş verdiyinə diqqət çəkib.

“Bu hücumlar Netanyahu hökumətinin beynəlxalq hüquq və bəşəri dəyərlərdən uzaq, qanunsuz düşüncə tərzini ortaya qoyur. İsrailin məsuliyyətsiz və aqressiv hərəkətləri təkcə bölgəni deyil, bütün dünyanı fəlakətə sürükləyir”, – deyə R.T.Ərdoğan qeyd edib.

 Hücumları qətiyyətlə pisləyirik!

Beynəlxalq ictimaiyyətə çağırış edən R.T.Ərdoğan deyib: “Beynəlxalq ictimaiyyət İsrailin regional və qlobal sabitliyi təhdid edən qanunsuz hərəkətlərinə dərhal son qoymalıdır. Bir daha bəyan edirik ki, Yaxın Şərqdə daha çox qan tökülməsini, dağıntıları və münaqişələri görmək istəmirik.”

R.T.Ərdoğan həmçinin deyib: “Türkiyə olaraq qonşumuz İrana qarşı edilən bu alçaq hücumları qətiyyətlə lənətləyirik. Dost və qardaş İran xalqına başsağlığı verir, həyatını itirənlərə Allahdan rəhmət, yaralılara isə tezliklə şəfa diləyirik.”