Türkiyə Xarici İşlər Nazirliyi bu addımı qeyri-qanuni və təxribat cəhdi kimi pisləyib və iddia edib ki, Netanyahu öz hakimiyyətini davam etdirmək üçün regional böhranları qızışdırır.

Türkiyə Knessetin işğal altındakı İordan çayının qərb sahilinin ilhaqına dair qərarını rədd edərək, onu beynəlxalq hüquqa əsasən “etibarsız” elan edib və bunun regional sabitliyə ciddi təhlükə yaratdığını vurğulayıb.

Türkiyə Xarici İşlər Nazirliyi bəyanatında "İordan çayının qərb sahili Fələstin ərazisidir və 1967-ci ildən İsrailin işğalı altındadır. İsrailin ilhaq etmək cəhdi qeyri-qanuni və təxribatdır, sülh səylərini pozmaqdır" deyilib.

Nazirlik bəyanatında həmçinin bildirilib ki, Netanyahu hökumətinin zorakı siyasət və qanunsuz hərəkətlərlə hakimiyyətdə qalmaq səyləri hər gün yeni böhranlara səbəb olur və beynəlxalq nizama və regional təhlükəsizliyə ciddi təhdid yaradır.

Nazirlik beynəlxalq ictimaiyyəti təcili və məcburi addımlar atmağa çağıraraq, "Soyqırım törədən İsrailin təcavüzünə qarşı təxirə salınmadan məcburi və çəkindirici tədbirlər görülməli, beynəlxalq sistemin hüquqi və mənəvi öhdəlikləri effektiv şəkildə yerinə yetirilməlidir" ifadəsini işlədib.

Qeyd edək ki, İsrail 1967-ci il Yaxın Şərq müharibəsindən bəri İordan çayının qərb sahilini işğal edib.

Fələstin Səhiyyə Nazirliyinin məlumatına görə, 2023-cü ilin sonunda İsrailin Qəzzaya son hərbi hücumundan bu yana, işğal altındakı İordan çayının qərb sahilində İsrail qüvvələri və qeyri-qanuni məskunlaşanlar tərəfindən təxminən 1000 fələstinli həlak olub, 7000-dən çox fələstinli yaralanıb.

Beynəlxalq Ədalət Məhkəməsinin 2024-cü ilin iyul ayında verdiyi tarixi qərarda İsrailin Fələstin ərazilərini işğal etməsinin qeyri-qanuni olduğu bildirilib və işğal altındakı İordan çayının qərb sahili və Şərqi Qüdsdəki bütün yaşayış məntəqələrinin boşaldılması çağırışı edilib.