“Sky News”a müsahibə verən ticarət naziri Conatan Reynolds bildirib ki, hökumət Fələstin dövlətini tanımaq istəyir və bunu edəcək. O, qeyd edib ki, bu addımın hazırkı parlament dövründə atılması mümkündür:

"Bəli, bu, hazırkı parlament dövründə baş verə bilər – əgər bu, bizə lazım olan sıçrayışı təmin edərsə. Amma unutmaq olmaz ki, biz bunu yalnız bir dəfə edə bilərik. Əgər bu addım sadəcə simvolik xarakter daşıyacaqsa və münaqişəyə son qoymayacaqsa, o zaman növbəti addımımız nə olacaq?"

C.Reynolds həmçinin Böyük Britaniyanın 2029-cu ildə keçiriləcək növbəti parlament seçkilərindən əvvəl Fələstin dövlətini tanımasının planlaşdırıldığını qeyd edib.

Bəzi məlumatlara görə, Baş nazir Kir Starmer Fələstin dövlətini dərhal tanımağa çağıran təzyiqlərlə üz-üzədir.

Parlamentin Xarici Əlaqələr Komitəsi də hökumətə çağırış edərək Fələstin dövlətini “cəsarətlə və qətiyyətlə” tanımağı və bunu israillilər və fələstinlilər üçün iki dövlətli həllə hazırlığın bir hissəsi kimi həyata keçirməyi tövsiyə edib.

Komitənin sədri, deputat Emily Tornberi deyib: "Çox sayda Britaniya vətəndaşı hökumətin bu məsələdə davamlı şəkildə çox az və çox gec hərəkət etməsindən ciddi narahatdır."

K.Starmerə yönələn siyasi təzyiqlərin bir göstəricisi kimi, 200-dən çox millət vəkili Fələstin dövlətinin tanınmasını tələb edən birgə məktubu imzalayıb.