Prezident Rəcəb Tayyib Ərdoğan milli döyüş təyyarəsi KAAN-ın İndoneziyaya ixracı ilə bağlı tarixi razılaşmanı ictimaiyyətə açıqlayıb.
Ərdoğan iyunun 11-də “X” platformasında etdiyi paylaşımda bu addımı "çox vacib və xoş bir irəliləyiş" kimi qiymətləndirib və qırıcıların Türkiyədə istehsal ediləcəyini, bunun İndoneziya ilə imzalanmış razılaşma çərçivəsində həyata keçiriləcəyini bildirib.
Razılaşma həmçinin İndoneziyanın yerli imkanlarının istehsal prosesinə daxil edilməsini də nəzərdə tutur.
Dövlət başçısı deyib: “Milli müdafiə sənayemizin inkişafını və mövcud imkanlarını vurğulayan bu razılaşmanın həm Türkiyə, həm də İndoneziya üçün xeyirli olmasını arzu edirəm”.
Rekord ixrac razılaşması
Prezident həmçinin sazişin imzalanmasında göstərdiyi təşəbbüsə görə İndoneziya prezidenti Prabowo Subiantoya təşəkkür edib və layihədə iştirak edən qurumları, xüsusilə Müdafiə Sənayesi Başçılığı və TUSAŞ-ı təbrik edib.
Hökumətinin sektoru dəstəkləməkdə davam edəcəyini vurğulayan Ərdoğan deyib: “Müdafiə sənayemizin daha da güclənməsi üçün bütün müdafiə şirkətlərimizə qəti şəkildə dəstək verməyə davam edəcəyik. Bu sahədə çalışan bütün qardaş və bacılarımıza ürəkdən təşəkkür edirəm”.
Qeyd edək ki, beşinci nəsil KAAN qırıcısı türk istehsalı olan ilk milli döyüş təyyarəsidir. 21 fevral 2024-cü ildə ilk uçuşunu həyata keçirən KAAN 8 min fut yüksəklik və 230 knot sürətə çatıb. 21 metr uzunluğa, 14 metr qanad eninə və 6 metr hündürlüyə malik olan KAAN-ın maksimal sürəti 1,8 Mach-dır.
TUSAŞ ayrıca olaraq süni intellekt, qabaqcıl sensor sistemləri və pilotsuz uçuş aparatları ilə birgə işləmə qabiliyyətini birləşdirəcək altıncı nəsil modelin planlarını da həyata keçirməyi nəzərdə tutur.
