Medianın verdiyi məlumata görə, Zahidanda məhkəmə binasına silahlı hücum nəticəsində ölənlərin sayı 6-ya, yaralıların sayı isə 24-ə çatıb.
Naməlum silahlı şəxslər İranın cənub-şərqindəki Zahidan şəhərində əsas məhkəmə binasına terror hücumu həyata keçirib. Yarı rəsmi "Fars" xəbər agentliyinin məlumatına görə, hücum edənlər məhkəmə binası kompleksinə atəş ediblər.
Hücumdan dərhal sonra hadisə yerinə təcili tibbi yardım qrupları və təhlükəsizlik qüvvələri gəlib. Xəsarət və dağıntılar barədə dəqiq məlumat yoxdur və səlahiyyətlilər hələ ki, hücum edənlərin şəxsiyyətlərini rəsmi şəkildə açıqlamayıblar.
Qeyd edək ki, Sistan və Bəlucistan əyalətinin paytaxtı Zahidan əvvəllər də Pakistan və Əfqanıstan sərhədlərinə yaxın ərazilərdə fəaliyyət göstərən silahlı qruplar tərəfindən iğtişaşlara və zaman-zaman zorakılıqlara səhnə olub.
