Türkiyə Prezident Administrasiyası İctimaiyyətlə Əlaqələr Departamentinin rəhbəri Fəxrəddin Altun bildirib ki, “Qıbrız xarici siyasət deyil, ortaq qardaşlıqdan qaynaqlanan milli bir məsələdir”.
Şimali Kiprin Lefkoşa şəhərində keçirilən bir konfransda çıxış edən F.Altun Cənubi Kipr tərəfindən idarə olunan ENOSİS hərəkatı və etnik təmizləmə səyləri nəticəsində Qıbrız türklərinə qarşı tətbiq olunan təzyiq və zorakılıqları xatırladıb, bu hadisələrin dərin kədər izləri buraxdığını vurğulayıb. O qeyd edib ki, Türkiyə 1974-cü ildə beynəlxalq hüquq çərçivəsindəki zəmanətçi hüquqlarına əsaslanaraq bütün diplomatik səylər nəticəsiz qaldıqdan sonra Qıbrız Barış Hərəkatını həyata keçirib. Bu əməliyyat Kipr türkləri üçün tarixi bir dönüş nöqtəsi olub və sülh və təhlükəsizlik dövrünün başlanğıcını qoyub.
Fəxrəddin Altun vurğulayıb ki, o vaxtdan bəri qıbrızlılar Kipr sülh danışıqları və federal həll yolunu dəstəkləyir, Cənubi Kiprin dəfələrlə rədd etməsinə baxmayaraq.
Türkiyə Prezident Administrasiyası İctimaiyyətlə Əlaqələr Departamentinin rəhbəri 2004-cü ildə keçirilən Annan Planı referendumu haqqında danışıb və qeyd edib ki, “Şimali Kiprin 65 faizi lehinə səs versə də, cənubun 76 faizi əleyhinə deyərək BMT-nin dəstəklədiyi sülh təklifini rədd edib. Amma təəssüf ki, Avropa İttifaqı bu rədd cavabını mükafatlandıraraq Cənubi Kipri birliyə qəbul edib və bununla Qıbrızı nəzərə almadığını göstərib”.
Onilliklər boyu davam edən federal danışıqların uğursuzluğunu vurğulayan Fəxrəddin Altun suveren bərabərlik və iki dövlətli həll əsasında yeni yolun qəbul edilməsinin vaxtının çatdığını bildirərək deyib: “Türkiyə Qıbrızın beynəlxalq səviyyədə bərabər statusla tanınması və hüquqlarının tam qorunması üçün qətiyyətli dəstəyini vurğulayır. Rəsmi Ankara Şimali Kipr Türk Respublikasına sarsılmaz dəstəyini bir daha təkrarlayır, prezident Rəcəb Tayyib Ərdoğan Qıbrızın tanınması üçün beynəlxalq çağırış edir. Xatırladım ki, Türkiyə prezidenti Birləşmiş Millətlər Təşkilatının 77-ci Baş Assambleyasındakı çıxışında qlobal ictimaiyyəti Şimali Kipri suveren dövlət kimi rəsmi olaraq tanımağa çağırdı. 2025-ci ilin may ayında Qıbrıza səfəri zamanı prezident Ərdoğan Türkiyənin Şimali Kiprin beynəlxalq mövqeyini gücləndirmək öhdəliyini bir daha təsdiqlədi və onu təcrid vəziyyətində qoymayacağımıza söz verdi”.
