ABŞ administrasiyası prezident Donald Trampın Hindistan və Pakistan arasında Kəşmir üzərindəki onilliklərdir davam edən münaqişədə vasitəçilik rolunu oynamağa açıq olduğunu bir daha vurğulayıb. Bu təşəbbüs onun uzun müddətdir davam edən beynəlxalq münaqişələri həll etmək öhdəliyinin bir hissəsi kimi təqdim olunur.

Həmin açıqlama iki nüvə silahlı qonşu arasında 10 may tarixində əldə edilən atəşkəs razılaşmasından sonra yayılıb. Razılaşma qısa, lakin təhlükəli gərginlikdən sonra baş verib ki, bu müddət ərzində sərhəd boyunca hava zərbələri, raket mübadiləsi və pilotsuz uçuş aparatlarının fəaliyyəti müşahidə olunub.

Döyüşlər dayandırılsa da, iki ölkə arasındakı əsas gərginliklər hələ də həll olunmamış qalır. İyunun 10-da keçirilən mətbuat konfransında Dövlət Departamentinin sözçüsü Tami Brüsə Trampın Kəşmir münaqişəsində vasitəçilik rolu ilə bağlı sual verilib. O, “Prezidentin planları və ya fikirləri barədə danışa bilmərəm”,-deyə cavab verib. Lakin əlavə edib ki, “Hamımız bilirik ki, prezident Tramp hər addımında ölkələr arasında nəsillər boyu davam edən fərqləri, müharibələri həll etmək üçün çalışır və bu məsələdə onun iştirakı təəccüblü deyil”.

Tami Brüsə, həmçinin prezident Trampın keçmişdə düşmən tərəfləri danışıqlar masasına gətirməkdəki uğurlarını qeyd edib və bu cəhdlərin əvvəllər mümkün olmadığının düşünüldüyünü bildirib. O, əlavə edib ki, “Tramp heç kimin mümkün hesab etmədiyi danışıqları başlatmaq üçün müəyyən insanları masaya gətirən yeganə şəxs olub və Kəşmir məsələsinin də hazırkı ABŞ administrasiyası dövründə həll olunacağına ümid edirəm.

“Başqa heç kim bunu etməzdi”

Ağ Evin Trampın bəyanatlarına uyğun olaraq konkret addımlar planlaşdırıb-planlaşdırmadığı barədə sual verildikdə Brüsə yalnız icra hakimiyyətindən gələcəkdə daha çox məlumatın ortaya çıxa biləcəyini bildirib. Tramp Yeni Dehli və İslamabad arasında son gərginliyi azaltmağa kömək etdiyini bildirərək, jurnalistlərlə söhbətində “Başqa heç kim bunu dayandıra bilməzdi” -deyə qeyd edib.

Diplomatik əlaqələrin müxtəlif səviyyələrdə davam etdiyi müşahidə olunur.

Brüsə təsdiqləyib ki, keçən həftə Pakistan parlament nümayəndə heyəti Bilaval Bhutto-Zardari rəhbərliyində Vaşinqtonda Dövlət Departamentinin yüksək vəzifəli şəxsləri, o cümlədən Siyasi İşlər üzrə müavin katib Allison Hooker ilə görüşüb. Görüşlərdə ikitərəfli əməkdaşlıq və atəşkəsə ABŞ-ın dəstəyi müzakirə olunub.

Brüsə həmçinin ABŞ rəsmilərinin Hindistan nümayəndə heyəti ilə də müzakirələr apardığını açıqlayıb. Müavin Katib Landau Hindistan qanunvericiləri ilə görüşərək, Vaşinqtonun terrora qarşı Hindistanın səylərinə dəstəyini bir daha təsdiqləyib.

Pakistan isə öz növbəsində qlobal paytaxtlarda fəal diplomatik təşəbbüslər həyata keçirir, son hərbi qarşıdurma ilə bağlı öz mövqeyini təqdim etmək və Kəşmir üzrə yenidən danışıqların başlanmasını təşviq etmək məqsədini güdür. Yeni Dehli isə ikitərəfli danışıqlara yenidən başlamağa hazır olduğunu açıq şəkildə bildirməsə də, regional dinamikadakı dəyişikliklər və Vaşinqtonun vasitəçi rolunu oynamağa hazır görünməsi gələcək diplomatiyanın gedişatına təsir göstərə bilər.

Hindistan Vaşinqtonun Pakistanla atəşkəsdə hər hansı bir rol oynadığını inkar edir, halbuki Pakistan açıq şəkildə Trampa təşəkkür edib və iki rəqib arasında gərginliyi azaltmaqda onun rolunu vurğulayıb.