“İran İsrailə doğru ən azı 100 raket atıb: onların əksəriyyəti vurulub və ya hədəfə çatmayıb”. Bunu İsrail ordusunun sözçüsü Efi Defrin deyib. "Son bir saatda İrandan İsrailə doğru iki yer-yer raket dalğası olub. Onların əksəriyyəti vurulub, ya da hədəfə çatmayıb. Bəziləri havada vurulduqdan sonra qalıqlarının düşməsi nəticəsində dağıntılara səbəb olub", - deyə o bildirib.

  Tehranın mərkəzi hissəsində yerləşən Mehrabad hava limanı yaxınlığında partlayış səsi eşidilib. Bu barədə “Mehr” agentliyi məlumat yayıb. Agentliyin yaydığı görüntülərdə qatı tüstü görünüb, amma hava limanına heç bir ziyan dəyməyib. Partlayış yerində güclü yanğın başlayıb.

  İsrail və İran bir-birinin həyati əhəmiyyətli obyektlərinə zərbələr endirdikcə gərginlik artır.

  İsrailin hücumlarından sonra İranın hava hücumundan müdafiə qüvvələri Tehrana yeni hücumlara qarşı durmaq üçün iyunun 12-si səhərdən fəaliyyətə başlayıb.

  Dövlət mediası İRNA-nın “İranın müdafiəsi sionist rejimin mərmilərinə qarşı durmaq üçün bir neçə dəqiqə əvvəl yenidən işə salınıb” açıqlaması ilə sürətli cavab xəbəri verib.

  İsrail ayrı-ayrılıqda ölkə ərazisinə atılan İran pilotsuz təyyarələrini ələ keçirdiyini bildirib.

  Müharibə gücləndikcə, bölgədə daha geniş bir qarşıdurma qorxusu artır.

  İsrailin hava zərbələri İranın nüvə obyektlərini, yüksək rütbəli hərbi xadimləri və mülki vətəndaşları hədəf alıb, onlarla adamın ölümünə və yüzlərlə insanın yaralanmasına səbəb olub. Bundan sonra ərəb dövlətləri regional gərginliyi cilovlamaq üçün diplomatik səylərini gücləndirib. Səudiyyə Ərəbistanı, Qətər, Misir, İordaniya, Küveyt, İraq və Fələstin İsrailin İrana hücumlara başlaması və rəsmi Tehranın cavab zərbələri nəticəsində bir israillinin ölməsi və onlarla adamın yaralanması ilə nəticələnən regional münaqişənin böyüyəcəyindən narahatlığını ifadə edib və tərəfləri milli suverenliyə hörmət etməyə və diplomatik həll yollarını axtarmağa çağırıb.

  Nyu-Yorkda Birləşmiş Millətlər Təşkilatı Təhlükəsizlik Şurası (BMT TŞ) üzvlərinin İran və İsrail arasında Yaxın Şərqi daha geniş müharibə həddinə çatdıran münaqişəni müzakirə etmək üçün fövqəladə iclasda toplaşdığı binada da gərginlik yaşanıb.

  İranın BMT nümayəndəsi Əmir Səid İrəvani şurada deyib ki, “Birləşmiş Ştatlar bu işə şərikdir. Cinayətlərə kömək etmək və onlara imkan verdiyi üçün tam məsuliyyəti bölüşməlidir”.

  ABŞ rəsmiləri şuraya bildirib ki, İsrail zərbələrdən əvvəl Ağ Evə məlumat verib, lakin Amerika qüvvələrinin hadisələrdə birbaşa iştirak etməyib.

  “İran hesab edir ki, İsrailin hücumundan sonra İranın nüvə proqramı ətrafında yaranmış böhranın həlli üçün rəsmi Vaşinqton və Tehran arasında danışıqlar mənasızlaşdı”. Bunu İranın Xarici İşlər Nazirliyinin (XİN) rəsmi nümayəndəsi İsmail Bəqayi bildirib.

  "ABŞ elə hərəkət etdi ki, dialoq mənasız oldu", - İranın Tasnim agentliyi diplomatın sözlərindən sitat gətirib.

  Qeyd edək ki, 2025-ci ilin aprel ayından bəri ABŞ və İran Omanın vasitəçiliyi ilə nüvə sazişi üzrə danışıqlar aparır. Danışıqların altıncı raundu 13 iyunda paytaxt Maskatda keçirilməli idi, lakin İsrailin zərbələri danışıqları şübhə altına qoydu.