Şimali İrlandiyada yeniyetmə qıza qarşı cinsi zorakılığa cəhd etməkdə ittiham olunan iki gəncin saxlanılmasından sonra irqi zəmində gərginlik artıb.

Məlumata görə, çərşənbə axşamı Balimena şəhərində polis ilə etirazçılar arasında qarşıdurma baş verib. Etirazçılar avtomobil və barrikadaları yandırıb, polis isə aksiyanı dağıtmaq üçün nümayişçilərə sərt müdaxilə edib.

Etirazlarla bağlı açıqlama verən yerli polis nümayəndələri zorakılığın irqi zəmində törədildiyini, hadisələrin bölgədəki etnik icma və polis əməkdaşlarını hədəf aldığını bildirib.

Gərginlik əsasən immiqrantların kompakt şəkildə yaşadığı ərazidə yaşanıb. Yerli sakinlər hadisələri dəhşətli adlandırıb və aksiyada iştirak edənlərin əcnəbiləri hədəf aldığını söyləyiblər.

Yerli mətbuatın yaydığı məlumata görə, yeniyetmə qıza qarşı cinsi zorakılıq etməkdə ittiham olunan iki gənc artıq məhkəmə qarşısına çıxarılıb.

Polis iğtişaşların maskalı şəxslərin barrikadalar qurmaq, raket toplamaq və əmlaka hücum etmək məqsədilə işdən çıxması ilə başladığını açıqlayıb.

Şimali İrlandiya Polis Xidməti (PSNI) evlərə və iş yerlərinə hücumların nifrət zəminində törədildiyini və bu hücumların araşdırıldığını bildirib. Təhlükəsizlik qüvvələri də davamlı hücumlara məruz qalıb, nəticədə 15 polis əməkdaşı xəsarət alıb, onlardan bir neçəsi xəstəxanaya yerləşdirilib.

Hadisə ilə bağlı 29 yaşlı bir kişi saxlanılıb. O, iğtişaş törətmək, ictimai asayişi pozmaq, cinayət törətməyə cəhd və polisə müqavimət göstərməkdə ittiham olunur.

Baş verən yanğın nəticəsində 4 evə ziyan dəyib, bəzi evlərin və iş yerlərinin qapı-pəncərələri dağıdılıb.

Hədəf alınan evin qarşısında yaşayan, 52 yaşlı rumıniyalı mühacir Korneliya Albu bildirib ki, ailəsi baş verənlərdən dərin qorxu keçirib. Fabrikdə çalışan Albu deyib: “Dünən gecə bir qrup adam evimizi yandırmağa cəhd etdi”.

O, indi köçmək məcburiyyətində olduğunu, lakin rumın əsilli olduğu üçün yaşamaq üçün başqa bir yer tapa bilməyəcəyindən narahatlığını dilə gətirib.