Tailand ilə Kamboca arasında təxminən altı müxtəlif nöqtədə baş verən toqquşmalar insan tələfatı və yaralanmalara səbəb olub. Tailand hərbi rəsmiləri vəziyyətin gərginləşməsindən sonra bütün sərhəd nəzarət-buraxılış məntəqələrinin bağlandığını açıqlayıb.

Tailandın rəsmi yayım orqanının verdiyi məlumata görə, Kamboca tərəfindən atılan raketlərdən biri iyulun 24-də (bu gün) səhər saatlarında Surin vilayətində sərhədyanı əraziya düşüb.

Tailand Silahlı Qüvvələri Kambocanı sərhədyanı zonanı raketlərlə vurmaqda ittiham edib. Ordu nümayəndələrinin açıqlamasına görə, iyulun 24-də (bu gün) saat 09:40-da Kamboca qüvvələri tərəfindən iki ədəd “BM-21” raketi atılıb.

Tailand rəsmiləri qarşı tərəfi ağır silahlarla ilk atəşi açmaqda günahlandırır. Kamboca Müdafiə Nazirliyi isə bəyan edib ki, onların hərbçiləri yalnız hücuma məruz qaldıqdan sonra özlərini müdafiə ediblər.

Hadisədən sonra Kamboca iyulun 24-də (bu gün) Tailandın paytaxtı Banqkokdakı bütün diplomatik heyətin geri çağırıldığını bəyan edib. “Khmer Times” nəşri xəbər verir ki, bu qərar Tailandın Kamboca səfirini ölkədən çıxarması və öz səfirini Pnompendən geri çağırmasından sonra qəbul olunub.

Qeyd edək ki, tərəflər arasındakı sərhəd mübahisəsi on illərdir davam edir və təxminən 15 il əvvəl də qanlı hərbi qarşıdurmalara səbəb olmuşdu.