Një sondazh i ri tregon se 58 për qind e amerikanëve besojnë se politika agresive tarifore e Presidentit Donald Trump do të dëmtojë ekonominë e vendit. 

Sondazhi, i bërë nga Shkolla Juridike Marquette, vlerësoi ndikimin në publik të vendimeve të Trumpit gjatë mandatit të tij të dytë, i cili filloi më 20 janar, i ndjekur nga një vorbull vendimesh gjithëpërfshirëse dhe ndonjëherë radikale.  

Sipas rezultateve, 58 për qind e amerikanëve besojnë se tarifat e shpallura nga Trump do të dëmtojnë ekonominë, ndërsa 28 për qind mendojnë se do të jenë të dobishme.

Një shumicë e qartë, pra 58 për qind, tha gjithashtu se ata mendojnë se politikat e tij do të nxisin inflacionin.

Një total prej 43 për qind e amerikanëve kanë një opinion negativ për Trumpin, ndërsa 64 për qind besojnë se mbyllja e institucioneve është përtej autoritetit të presidentit, pas një sërë lëvizjesh nga Trump dhe ndihmësit si dhe kabineti i tij për mbylljen e Departamentit të Arsimit dhe USAID-it, ndër të tjera.

Për më tepër, 70 për qind e të anketuarve thanë se gjyqtarët që vendosin kundër vendimeve të Trumpit nuk duhet të hiqen. 

Trump njoftoi të mërkurën se ShBA-ja do të vendosë tarifa reciproke ndaj vendeve të tjera, me tarifën bazë prej 10 për qind.

Që nga fillimi i mandatit të tij të dytë, urdhrat ekzekutivë të Trumpit janë kundërshtuar shpesh në gjykatë, madje shumë gjyqtarë federalë kanë nxjerrë vendime për të pezulluar ose përmbysur këto politika.

Shumë prej çështjeve pritet të përfundojnë në Gjykatën e Lartë të ShBA-së, e cila ka një shumicë gjyqtarësh konservatorë të emëruar nga presidentë dhe nga republikanët e partisë së Trumpit. Gjyqtarët, megjithatë, jo gjithmonë votojnë në përputhje me shtrirjen e tyre të perceptuar.