Izraeli ka vendosur të mbyllë një shkollë të administruar nga agjencia e OKB-së për refugjatët palestinezë (UNRWA) në Kudsin Lindor të pushtuar.

Zyra e Guvernatorit së Kudsit tha se forcat izraelite bastisën shkollën e UNRWA-s për vajza në kampin e refugjatëve Shu’fat në Kudsin Lindor dhe dhanë urdhër ushtarak që kërkon mbylljen e shkollës nga 8 maji.

Sipas urdhrit, askush nuk do të lejohet të hyjë në ndërtesën e shkollës pas 8 majit, përfshirë drejtorët, mësuesit apo stafi tjetër i shkollës.

“Çdo shkelje e urdhrit do të konsiderohet vepër penale”, thuhet në urdhrin e ushtrisë izraelite.

Izraeli përmendi mungesën e një licence për hapjen e një shkolle dhe nuk specifikoi se për sa kohë do të qëndrojë e mbyllur shkolla.

Deri më tani nuk ka pasur asnjë koment nga UNRWA-ja apo Izraeli mbi raportin.

Në tetor të vitit 2024, parlamenti izraelit miratoi dy ligje që ndalojnë operacionet e UNRWA-së në Izrael dhe në zonat nën pushtimin e saj, si dhe ndalojnë autoritetet izraelite të kenë ndonjë kontakt me agjencinë e OKB-së. Ligjet hyrën në fuqi më 30 janar.

Izraeli pretendon se punonjësit e UNRWA-s ishin të përfshirë në sulmin e Hamasit më 7 tetor të vitit 2023, një akuzë e mohuar fuqishëm nga agjencia e OKB-së.

E themeluar në vitin 1948, UNRWA ka shërbyer si një mjet jetësor kritik për refugjatët palestinezë, duke mbështetur afër 5,9 milionë njerëz në gjithë Gazën, Bregun Perëndimor, Jordani, Siri dhe Liban.