Ushtria izraelite bastisi xhamitë në Bregun Perëndimor të pushtuar dhe i vuri zjarrin xhamisë "Naser" në qytetin Nablus.

Flakët u përhapën në një zonë të gjerë për shkak se forcat izraelite penguan zjarrfikësit që kërkonin të shuanin zjarrin. Për shkak të sulmit në xhami është djegur pjesa e brendshme e saj.

Si pasojë e sulmit u dogjën edhe disa kopje të Kuranit në xhami. Në sulmet e saj në Bregun Perëndimor, ushtria izraelite dëmton transportin, ujin, energjinë elektrike dhe infrastrukturën e komunikimit si dhe shkatërron shtëpitë në rajon.

Ushtria izraelite krahas bastisjeve, sulmeve ajrore, hedhjes në erë të vendbanimeve civile, shkatërrimit të infrastrukturës me makineri ushtarake dhe detyrimit të palestinezëve të migrojnë, dëmton jetën dhe pronën e palestinezëve përmes akteve të ndryshme.

Pas hyrjes në fuqi të marrëveshjes së armëpushimit dhe shkëmbimit të pengjeve në Gaza më 19 janar, ushtria izraelite ka rritur ashpërsinë e sulmeve në Bregun Perëndimor të pushtuar.

Raportuesja e posaçme e OKB-së për Palestinën, Francesca Albanese përmes një postimi më parë në X në lidhje me sulmet e ushtrisë izraelite në Bregun Perëndimor tha se gjatë armëpushimit që vazhdon në Gaza, Izraeli e ka zhvendosur fushatën e tij gjenocidale në Bregun Perëndimor të pushtuar.

Që nga 7 tetori 2023, në sulmet e ushtarëve izraelitë dhe izraelitëve që kanë uzurpuar tokat palestineze në Bregun Perëndimor dhe Kudsin Lindor të pushtuar, janë vrarë të paktën 928 palestinezë, përfshirë 167 fëmijë, ndërsa janë plagosur rreth 7.000 të tjerë.