Drejtori i Drejtorisë për Mbrojtje dhe Shpëtim i Maqedonisë së Veriut, Stojançe Angellov, thotë se ka shenja se zjarri që shpërtheu të dielën pasdite në rrugën që çon nga kryeqyteti Shkup në pikën kufitare të vendit me Kosovën, Bllacë, ishte zjarrvënie e qëllimshme.
Sipas tij, këtë mëngjes, zjarrfikësit gjetën paleta druri në vendin e zjarrit, të cilat duhet të përcaktohen nëse janë spërkatur me benzinë dhe janë hedhur në pemët e dëllinjës.
"Po dalin shenja të reja rreth zjarrit që shpërtheu rreth mesditës së të dielës përgjatë rrugës kryesore që çon nga Shkupi në pikën kufitare të Bllacës, se ishte zjarrvënie e qëllimshme", tha Angellov.
"Dikush po përpiqej qëllimisht ta ndizte përsëri këtë zjarr mëngjesin e sotëm, i cili është ende nën kontroll", shtoi ai.
Ai u bëri thirrje qytetarëve që nëse vërejnë sjellje të dyshimta, veçanërisht njerëz që mbajnë paleta druri në automjetet e tyre ose në duar, ta raportojnë menjëherë në numrin 112.
Angellov gjithashtu mohoi pretendimet se nga zjarri janë djegur disa shtëpi në fshatin Çuçer dhe se një manastir ose kishë ishte në rrezik të menjëhershëm nga zjarri.
9 vatra aktive të zjarrit në mbarë vendin
Ndërkaq, Qendra e Menaxhimit të Krizave e Maqedonisë së Veriut (QMK) njoftoi se në mbarë vendin, deri në orën 12:30 janë gjithsej 10 zjarre në hapësirë të hapur.
Sipas QMK-së, 9 prej tyre janë ende aktive ndërsa një i lokalizuar. Në mesin e zjarreve aktive sipas QMK-së është edhe ai në Komunën e Çuçer Sandevës, ku zjarri ka përfshirë pyll të përzier dhe vegjetacion të ulët.
Ministria e Punëve të Brendshme në një njoftim sot tha se që nga orët e mëngjesit dy helikopterë nga Njësia e Helikopterëve të Policisë së Ministrisë së Brendshme, të tipit "Bell 412" dhe "Agusta Bell 212", kanë marrë pjesë intensivisht në shuarjen e zjarrit në afërsi të Çuçer Sandevës.
Ministria tha se deri më tani janë lëshuar mbi 70 tonë ujë, në përpjekje për shuarjen e zjarrit.
Si pasojë e përhapjes së zjarrit në afërsi të Bllacës, autoritetet e Maqedonisë së Veriut dje njoftuan se trafiku në rrugën Stenkovec-Bllacë është ndërprerë plotësisht në të dy drejtimet, përfshirë edhe pikën kufitare drejt Kosovës. Ndërsa më pas kufiri u hap përsëri.
