Në Universitetin Ndërkombëtar Ballkanik (IBU) në Shkup, dje u mbajt ceremonia zyrtare e hapjes së kampit “DIGIAGE” – Kampi për Zhvillimin e Lojërave Digjitale për Evropën Lindore dhe Ballkanin 2025.

Ngjarja bashkoi mysafirë të shquar dhe palë të interesuara nga rajoni, me fjalime hyrëse nga rektori i IBU-së, prof. dr. Lütfi Sunar, drejtori i përgjithshëm i “Bilişim Vadisi”, Erkam Tüzgen, dhe drejtori i “DIGIAGE”, Emre Yıldız. Të gjithë theksuan rëndësinë në rritje të industrisë së lojërave dhe domosdoshmërinë e bashkëpunimit ndërkombëtar për nxitjen e inovacionit dhe sipërmarrjes digjitale.

Rektori Sunar theksoi fokusin strategjik të IBU-së në inovacion, punë ekipore dhe transformim digjital gjatë këtij aktiviteti universitar këtë javë.

"Po ndërtojmë themelin e epokës digjitale," tha Sunar, duke theksuar zgjerimin e universitetit në fushën e teknologjisë dhe dizajnit. Aktualisht, IBU ofron gjashtë programe në inxhinieri kompjuterike, ndërsa deri në fund të vitit planifikon ta rrisë këtë numër në dhjetë, duke përfshirë studime të reja në inxhinieri softuerike dhe siguri të rrjetit.

Sunar gjithashtu vuri në dukje rëndësinë sociologjike të bashkëpunimit dhe konkurrencës në arsim dhe në jetën institucionale, duke shtuar se ky projekt paraqet një mundësi të vërtetë për transferim të dijes.

Drejtori i përgjithshëm i “Bilişim Vadisi”, Tüzgen, deklaroi: “Si ‘Bilişim Vadisi’, e mbështesim seriozisht industrinë e lojërave. Më parë kemi organizuar 9 kampe ‘Digiage’. Tani po e organizojmë programin e parë evropian në Maqedoninë e Veriut në bashkëpunim me IBU. Qëllimi ynë është të lidhim sipërmarrësit në industrinë e lojërave dhe të ndërtojmë ura të përbashkëta.”

Drejtori i “DIGIAGE”, Yıldız, theksoi: “Qëllimi ynë është të bashkojmë të rinjtë që dëshirojnë të hyjnë në ekosistemin e lojërave ose tashmë janë pjesë e tij, qoftë në kërkim të investimeve apo të publikimit të lojës së tyre. Ky kamp që po e mbajmë në Maqedoninë e Veriut është i dhjeti me radhë nga DIGIAGE.”

Kampi është organizuar në partneritet ndërmjet IBU, Bilişim Vadisi (Türkiye) dhe Universitetit Singidunum (Serbi), dhe këtë vit mbledh 65 pjesëmarrës nga vende si Türkiye, Azerbajxhani, Serbia dhe Maqedonia e Veriut. Gjatë katër ditëve të ardhshme, pjesëmarrësit do të punojnë intensivisht për zhvillimin e dy prototipeve inovative të lojërave, me mbështetjen e mentorëve ekspertë dhe profesionistëve të industrisë.

Si një qendër dinamike e përsosmërisë akademike dhe bashkëpunimit ndërkombëtar, IBU vazhdon të jetë lider në aftësimin e talenteve të rinj në botën digjitale. Me infrastrukturën moderne dhe përkushtimin ndaj inovacionit, IBU ofron një mjedis ideal për nxitjen e kreativitetit, bashkëpunimit ndërkufitar dhe shpirtit sipërmarrës.

“DIGIAGE” – Kampi për zhvillimin e videolojërave është pjesë e projektit Erasmus+ 2023-3-KA210-YOU-000184390 dhe ofron një mundësi unike për zhvilluesit e rinj të lojërave që të fitojnë përvojë praktike, të përmirësojnë aftësitë e tyre dhe të ndërtojnë rrjete profesionale afatgjata.

Edhe pse ceremonia e hapjes ka përfunduar, pjesëmarrësit do të vazhdojnë të punojnë në projektet e tyre deri më 25 prill, duke eksploruar të gjithë procesin e zhvillimit të lojës – nga koncepti deri te prototipi – gjithçka brenda një atmosfere energjike dhe mbështetëse në IBU.