Paqja botërore kërkon një mirëkuptim global të bazuar në të vërtetën dhe drejtësinë, deklaroi të mërkurën Drejtori i Komunikimeve i Türkiyes.
“Për paqen dhe qetësinë e botës, është thelbësore që një mirëkuptim që ka në qendër të vërtetën dhe drejtësinë të mbizotërojë globalisht,” tha Fahrettin Altun në Forumin Mediatik Türkiye-Kinë, të organizuar nga Drejtoria e Komunikimeve të Türkiyes në kryeqytetin Ankara.
Altun theksoi se marrëdhëniet midis Türkiyes dhe Kinës historikisht janë ndërtuar mbi respekt të ndërsjellë, bashkëpunim dhe afërsi kulturore.
“Kjo marrëdhënie, që mban shpirtin e Rrugës së Mëndafshit të lashtë, po fiton tani një terren të ri dhe të fuqishëm edhe në fushën e medias dhe komunikimit.”
Türkiye po lufton për paqe dhe mirëqenie për të gjithë
Altun theksoi se “Türkiye ka luftuar për paqe dhe mirëqenie për të gjithë, me fuqinë e saj stabilizuese.”
“Me këtë vizion, vendi ynë ka marrë përgjegjësi në pothuajse të gjitha krizat e fundit dhe ka qenë mikpritës i takimeve diplomatike dhe negociatave për paqe. Qëllimi ynë themelor është që e vërteta dhe drejtësia të mbizotërojnë në çdo fushë”, shtoi ai.
“Mënyra për ta arritur këtë është përmes një përfaqësimi më të drejtë në ekosistemin ndërkombëtar të komunikimit, ashtu si edhe në diplomaci.”
Një strukturë globale mediatike rezistente ndaj dezinformimit, ku e gjithë njerëzimi mund të bëjë të dëgjohet zëri i vet, është gjithashtu çelësi për paqen globale, shtoi Altun.
Dezinformimi, ‘një problem i përbashkët’
Altun tha se teknologjitë e reja të komunikimit, si digjitalizimi, kanë pasur ndikim të rëndësishëm në media; megjithatë, kjo transformim ka sjellë edhe sfida.
“Sidomos kërcënime si dezinformimi, operacionet e perceptimit, manipulimi i përmbajtjes artificiale dhe polarizimi digjital nuk janë vetëm problem i një vendi apo rajoni, por një problem i përbashkët i opinionit publik global”, theksoi ai.
Ai theksoi rëndësinë e vendosjes së besimit në komunikim, saktësisë së informacionit dhe përgjegjësisë në etikën mediatike përballë shkatërrimit të së vërtetës.
“Mënyra për ta arritur këtë është përmes bashkëpunimit shumëpalësh, ndarjes së ndërsjellë të përvojës dhe solidaritetit ndërkombëtar mediatik”, tha Altun.
“Në këtë drejtim, ne po e zhvillojmë Forumin Mediatik Türkiye-Kinë si një platformë që i shërben interesave të përbashkëta jo vetëm të dy vendeve, por edhe të komunitetit global mediatik” theksoi Kreu i Komunikimeve turke.
Altun shtoi se ata gjithmonë kanë vlerësuar dhe i kanë dhënë përparësi ndarjes së përvojës dhe informacionit me vendet mike dhe partnere strategjike, si Kina.
“Ky forum është një manifestim i këtij mirëkuptimi”, u shpreh ai, duke shtuar se Türkiye dhe Kina janë dy vende që kanë kapacitet të zhvillojnë jo vetëm bashkëpunim ekonomik, por edhe bashkëpunim të bazuar në qytetërim.
