Bashkëshortja e Presidentit të Türkiyes Recep Tayyip Erdoğan, Emine Erdoğan, u takua në Vatikan me udhëheqësin shpirtëror të katolikëve dhe Presidentin e Shtetit të Vatikanit, Papa Leon XIV.

Gjatë aktivitetit me temën “Ekonomia e bazuar në vëllazëri: Multilateralizmi etik” që u mbajt në Institutin Papnor për Shkencat Shoqërore, Emine Erdoğan, e cila ndodhej në Vatikan për të mbajtur një fjalim, realizoi një takim me Papën Leon XIV në Pallatin Apostolik të Vatikanit.

Sipas informacioneve të marra nga burime të Presidencës, gjatë takimit u diskutuan çështje si situata kritike në Gaza, përpjekjet për të luftuar ndryshimet klimatike, lufta kundër islamofobisë dhe racizmit, si dhe rëndësia e ekzistencës së familjes në shoqëri.

Gjatë takimit, Emine Erdoğan përgëzoi Papën Leon XIV, i cili është zgjedhur së fundmi në këtë detyrë, si dhe shprehu urimet e saj që kjo të jetë një zhvillim i mbarë për botën e krishterë.

Emine Erdoğan tërhoqi vëmendjen ndaj tragjedisë njerëzore në Gaza

Në takim u trajtua me theks të veçantë tragjedia njerëzore në Gaza, e cila ndodhet nën sulmet dhe bllokadën e Izraelit, dhe Emine Erdoğan theksoi për Papën rëndësinë që bota e krishterë të japë një mbështetje më të fuqishme për arritjen e një armëpushimi të përhershëm dhe për dërgimin e ndihmave humanitare.

Emine Erdoğan shprehu gjithashtu rëndësinë e zbatimit sa më parë të një zgjidhjeje me dy shtete për paqe të qëndrueshme dhe të përhershme në Palestinë dhe rëndësinë që të rritet numri i vendeve që e njohin zyrtarisht shtetin e Palestinës.

Ajo i tha Papës se edhe të krishterët që jetojnë në rajon, kishat dhe komunitetet e të cilëve ndodhen vazhdimisht nën kërcënim, duhet më në fund të gjejnë paqe.

Mësohet se Papa Leon XIV i tha Emine Erdoğanit se Vatikani ka vepruar gjithmonë sipas parimit të të qenit pjesë e zgjidhjes në Lindjen e Mesme dhe se Vatikani mbështet paqen dhe një zgjidhje me dy shtete në Palestinë.

Ftesë për mbështetje për nismën “Zero Mbetje” drejtuar Papës

Në takim, Emine Erdoğan theksoi se komuniteti ndërkombëtar po përballet sot me shumë sprova jetike, si dhe përkujtoi se njëra prej tyre është edhe lufta kundër ndryshimeve klimatike.

Ajo i foli Papës për nismën “Zero Mbetje”, që ka filluar në Türkiye dhe për të cilën ajo jep përparësi edhe në mënyrë personale.

Duke shprehur besimin se çështja e luftës kundër ndryshimeve klimatike ka potencial të fortë bashkëpunimi ndërmjet Türkiyes dhe Vatikanit, Emine Erdoğan theksoi se është e rëndësishme që Papa Leon XIV të japë mbështetje për nismën “Zero Mbetje”, e cila është institucionalizuar sot në kuadër të OKB-së.

Mësohet se Papa Leon XIV ka thënë në përgjigje: “Patjetër që duhet të gjejmë mënyra për të punuar së bashku.”

Thirrje për bashkimin e përpjekjeve kundër islamofobisë, racizmit dhe intolerancës

Në takim u vu në dukje gjithashtu se islamofobia, racizmi dhe intoleranca janë në rritje shqetësuese, e Zonja e Parë turke theksoi se këto prirje nuk përbëjnë rrezik vetëm për grupet që i kanë në shënjestër, por edhe për të gjitha shtresat e shoqërisë.

Erdoğan shprehu se përpjekjet në këtë drejtim duhet të bashkohen rreth një vullneti të përbashkët.

Ajo theksoi se Türkiye është një vend ku prej shekujsh bashkëjetojnë në paqe besime dhe kultura të ndryshme dhe se komunitetet e krishtera janë pjesë e pandashme e mozaikut të pasur të Türkiyes.

Emine Erdoğan përmendi gjithashtu se Presidenti Recep Tayyip Erdoğan tregon ndjeshmëri të veçantë ndaj problemeve të grupeve minoritare fetare dhe se problemet lidhur me pasuritë e paluajtshme të vakëfeve të minoriteteve janë zgjidhur në favor të tyre përmes ndryshimeve ligjore.

Papa: “Türkiye është një zë i rëndësishëm për paqen në Lindjen e Mesme”

Gjatë takimit, Papa Leon XIV i tha Emine Erdoğanit se shumë grupe në Lindjen e Mesme nuk i respektojnë të drejtat e të krishterëve, por se mbrojtja e të drejtave të të krishterëve dhe minoriteteve të tjera në Türkiye përbën një model.

Mësohet se Papa ka thënë: “Türkiye është një zë i rëndësishëm për paqen në Lindjen e Mesme.”

Papa Leon XIV i ka shprehur gjithashtu Emine Erdoğanit dëshirën për ta realizuar një nga vizitat e para jashtë vendit si Papë në Türkiye, dhe është thënë se autoritetet e Türkiyes dhe të Vatikanit po punojnë për këtë çështje, me një planifikim për në fund të nëntorit.

Papa ka kujtuar se ky vit është 1.700-vjetori i Këshillit të Iznikut dhe ka shtuar: “Türkiye është një vend i rëndësishëm për të krishterët, por në të njëjtën kohë, është një urë origjinale dhe e rëndësishme për ndërtimin e paqes, dhe luan një rol të rëndësishëm.”

Në takim u theksua edhe rëndësia e institucionit të familjes

Pjesë e diskutimeve të tyre ishte gjithashtu rëndësia e familjes.

U theksua se familja është çelësi i paqes shoqërore dhe se mund të jetë zgjidhje për shumë probleme si individualizmi dhe vetmia që po marrin përmasa sot.

U nënvizua gjithashtu se në të dyja besimet familja ka një vlerë dhe vend të rëndësishëm dhe se duhet të mbahet një qëndrim i përbashkët i të gjitha feve hyjnore kundër kërcënimeve globale që synojnë t’i shkatërrojnë vlerat familjare.

Në lidhje me takimin me Papën, Zonja e Parë Turke në një postim në rrjetin social X shprehu mirënjohjen e saj për mikpritjen e ndjeshme të Vatikanit.