Rusia ka rritur ndjeshëm vëllimet e prodhimit në të gjitha llojet e armëve, tha të mërkurën ministri rus i Industrisë dhe Tregtisë, Anton Alikhanov.

Duke folur në parlament në Moskë, Alikhanov tha se industria ushtarake vazhdon të rrisë kapacitetin e saj për të përmbushur të gjitha nevojat e brendshme dhe porositë e huaja.

"Së bashku, ne kemi rritur ndjeshëm vëllimet e prodhimit në të gjitha llojet e armëve. Në takimet me presidentin në lidhje me projektin e programit shtetëror të armatimit, industria konfirmoi gatishmërinë e saj për të zbatuar plotësisht të gjitha planet e shpallura", tha ai.

Që nga viti 2025, Rusia renditet e treta në nivel global për sa i përket eksporteve të armëve, tregojnë të dhënat e Institutit Ndërkombëtar të Kërkimeve për Paqen në Stokholm (SIPRI). Ndërsa pozicionet kryesore mbahen nga SHBA-ja dhe Franca.